Դեռևս 2 ամիս առաջ, անդրադառնալով Մաքսային միությանը Հայաստանի անդամակցության խնդրին` Էներգետիկայի և բնական պաշարների նախարար Արմեն Մովսիսյանն ասել էր. «Մաքսային միությունը ձեռնտու է այն առումով, որ մենք Ռուսաստանից ներմուծում ենք միջուկային վառելիք և գազ»: Նախարարի այս հայտարարությունն դեռևս այն ժամանակ տարաբնույթ մեկնաբանությունների առիթ տվեց:
Այսօր արդեն մաքսային միությանը Հայաստանի անդամակցությունը, թերևս կարաված փաստ է: Բայց արդյո՞ք դա նշանակում է, որ առաջիկայում մեր երկիրն ավելի էժան գազ կարող է ձեռք բերել Ռուսաստանից:
«Փաստինֆո»-ի խնդրանքով պատասխանելով նման հեռանկարի հավանականությանը վերաբերող հարցին՝ «ՀայՌուսԳազարդի»-ի հասարակայնության հետ կապերի ծառայության պետ Շուշան Սարդարյանը դժվարացել է միանշանակ ասել, թե առաջիկայում հնարավոր է գազի գնի վերանայում, թե՝ ոչ:
«Մաքսային միությանը միանալու հարցը միջկառավարական, միջպետական հարաբերությունների դաշտում է, ինչ վերաբերում է փաստացի այսօրվա մեր գազի ներկրման գնի հարցին, ապա դա առևտրային պայմանագիր է 2 տնտեսավարողների միջև»,- ասել է մեր զրուցակիցը՝ հավելելով. «թե ինչքանով մաքսային միությունը ազդեցություն կունենա, կամ չի ունենա, դա արդեն միջկառավարական, միջպետական հարաբերությունների դաշտում է»:
Նշենք, որ, օրինակ, Ուկրաինային Մաքսային միությանը միանալու դիմաց Ռուսաստանը պաշտոնական մակարդակով գազի լուրջ զեղչեր է խոստացել: Ըստ ՌԴ նախագահի խորհրդական Սերգեյ Գլազեւի՝ Միասնական տնտեսական տարածքի շրջանակում Ուկրաինայի համար գազի գինը մոտ կլիներ այն սակագնին, որով այն ներկայում վաճառվում է Բելառուսին:
Հիշեցնենք, որ ի տարբերություն մաքսային միությանն անդամակցած Բելառուսի՝ Հայաստան արտահանվող գազի վրա Ռուսաստանը կիրառում է 30 % արտահանման հարկ: Մինչդեռ, այդ միավորին անդամակցելուց հետո, գտնվելով ընդհանուր մաքսային տարածքում՝ մեր երկիրը, թերևս, նույնպես կարող է ազատվել այդ հարկատեսակից:
