«Կամ-կամ»-ը կսահմանափակեր ՀՀ արտաքին քաղաքականության հնարավորությունները: Այս մասին այսօր «Առաջին լրատվական»-ի հետ զրույցում ասաց ԼՂՀ ԱԺ արտաքին հարաբերությունների հանձնաժողովի նախագահ Վահրամ Աթանեսյանը՝ անդրադառնալով երեկ ՀՀ նախագահ Սերժ Սարգսյանի և ՌԴ նախագահ Վլադիմիր Պուտինի հանդիպմանը, որի ժամանակ Սերժ Սարգսյանը հայտարարել էր ՄՄ-ին Հայաստանի միանալու ցանկության մասին:
Նա նշեց, որ դա Հայաստանի Հանրապետության որոշումն է, և ԵՄ-ի հետ Ասոցացման համաձայնագրի շուրջ բանակցելով հանդերձ՝ Հայաստանը չի հայտարարել, թե ցանկություն չունի միանալու Մաքսային միությանը կամ միանշանակ ընտրություն է կատարել՝ հարաբերությունները զարգացնելու միայն ԵՄ-ի կամ եվրոպական երկրների հետ, այնպես որ՝ ըստ էության, Մոսկվայում անսպասելի ոչինչ տեղի չի ունեցել:
«Մանավանդ, եթե հաշվի առնենք, որ ՀՀ նախագահը հայտարարել է, որ Հայաստանը ցանկություն ունի միանալու Մաքսային միությանը և հետագայում Եվրասիական տարածքի ինտեգրացիոն գործընթացներին: Միևնույն ժամանակ, որքանով ես եմ տեղյակ, Սարգսյանը նշել է, որ դա չի նշանակում եվրոպական գործընկերների հետ երկխոսության դադարեցում: Որքան Հայաստանն է շահագրգռված ԵՄ-ի հետ հարաբերություններում, այնքան էլ ԵՄ-ն՝ Հայաստանի հետ հարաբերությունների զարգացմամբ: Մինչ նախաստորագրման արարողությունը՝ բավական երկար ժամանակ կա, և հնարավոր է, որ ԵՄ-ն Հայաստանի հարաբերություններում գտնի այն համաձայնության դաշտը, որը չի խանգարի Հայաստանին զարգացնելու իր հարաբերությունները ՌԴ-ի հետ»,- մեկնաբանեց Վահրամ Աթանեսյանը:
Հարցին՝ Ղարաբաղի շահը ո՞րն է, նա պատասխանեց, որ նման կտրուկ շեշտադրումներ չպետք է անել: Նրա խոսքով՝ ինքը ուշադիր հետևում է քաղաքագիտական վերլուծություններին, բանավեճին և տարօրինակ է համարում այն, որ ամեն կերպ ցանկություն կա խնդիրը ներկայացնելու այնպես, թե Հայաստանը պետք է կա՛մ ռուսական ազդեցության գոտում լինի, կա՛մ ԵՄ-ի:
«Ես կարծում եմ, որ ՀՀ-ն հնարավորություն ունի լինելու ՀԱՊԿ անդամ, խորացնելու հարաբերությունները ՌԴ-ի հետ՝ միաժամանակ լինելով ԵՄ-ի գործընկերը: Այստեղ «կամ-կամ»-ի հարց չկա: Դա որոշակիորեն սահմանափակում է ՀՀ արտաքին քաղաքականության հնարավորությունները: Չեմ կարծում, թե որևէ ճնշում կարող է ռուսական կողմից կամ որևէ այլ եվրոպական երկրի կողմից տրվել այդքան միանշանակ, որքանով ներկայացնում են շատ քաղաքագետներ ու միջազգայնագետներ»,- նշեց նա:
Հիշեցնենք. նա ավելի վաղ նշել էր, որ Ղարաբաղն իր ընտրությունը կկատարի ԼՂՀ միջազգային ճանաչման գործընթացից հետո:
Լուսանկարը՝ Photolure-ի
