Ադրբեջանական Trend լրատվական գործակալության փոխանցմամբ, Ադրբեջանում ԱՄՆ դեսպան Մեթյու Բրայզան անդրադարձել է ԵԱՀԿ Մինսկի խմբի համանախագահ երկրների՝ ԱՄՆ-ի, Ռուսաստանի ու Ֆրանսիայի նախագահների երեկվա հայտարարությանը, որն առնչվում էր ղարաբաղյան հակամարտության կարգավորմանը.
«Այդ հայտարարությամբ երեք երկրների նախագահներն ընդգծեցին հակամարտության խաղաղ կարգավորման կարևորությունը: Ես դեռ չեմ կարդացել հայտարարության տեքստը, սակայն կարծում եմ, որ այն նման է նախկին հայտարարությանը:
Այդ հայտարարությունն ի ցույց դրեց խնդրի խաղաղ կարգավորման հարցում երեք երկրների միացյալ տեսակետը: Այդ հայտարարությունը հաստատեց, որ չկա առավել կարևոր բան, քան ԵԱՀԿ Մինսկի խմբի շրջանակներում տարվող բանակցային գործընթացում ջանքերի ավելացումը»:
Հիշեցնենք, որ երեկ ԱՄՆ նախագահ Բարաք Օբաման, Ռուսաստանի նախագահ Դմիտրի Մեդվեդևն ու Ֆրանսիայի նախագահ Նիկոլա Սարկոզին համատեղ հայտարարություն են տարածել ղարաբաղյան հակամարտության կարգավորման շուրջ:
Դրանում երեք երկրների նախագահներն Ադրբեջանի ու Հայաստանի առաջնորդներին կոչ են արել բնակչությանը պատրաստել խաղաղության և ոչ թե պատերազմի, իսկ հունիսին կայանալիք հանդիպման ժամանակ ավարտին հասցնել հիմնական սկզբունքների մշակման վրա տարվող աշխատանքները.
«Երբ պայմանավորվածությունը ձեռք բերվի, մենք պատրաստ ենք հաստատել այդ սկզբունքների պաշտոնական ճանաչումը, աջակցել խաղաղ համաձայնագրի մշակմանն ու դրա իրագործմանը՝ մեր միջազգային գործընկերների հետ միասին»:
Ի դեպ, Հայաստանի, Ադրբեջանի և Ռուսաստանի նախագահների հանդիպումը կայանալու է հունիսի 25-ին Կազանում:
