Գերմանիայի կառավարությունը, որն արգելել էր Թուրքիայի իշխող «Արդարություն և զարգացում» կուսակցության (AKP) ներկայացուցիչ, արդարադատության նախարար Բեքիր Բոզդաղի և իշխանական թևի բոլոր ներկայացուցիչների մասնակցությամբ Գերմանիայում որևէ հանրահավաքի անցկացումը, թուրք ընդդիմադիրներին թույլատրել է հանրահավաք կազմակերպել: Այս մասին հայտնում է թուրքական haberler.com-ը:
Գերմանիայի կառավարությունը Թուրքիայի գլխավոր ընդդիմադիր՝ քեմալական Ժողովրդա-հանրապետական (CHP) կուսակցությանը թույլատրել է սահմանադրական փոփոխությունների «ոչ» թևի պաշտպանության նպատակով Գերմանիայում քարոզչական հանրահավաք իրականացնել:
Հանրահավաքին CHP-ից մասնակցելու է Անթալիայից ընտրված պատգամավոր Դենիզ Բայքալը:
Դենիզ Բայքալի մասնակցությամբ հանրահավաքը տեղի է ունենալու մարտի 5-ին, Գերմանիայի Շտուտգարտ քաղաքում:
Մարտի 2-ին Թուրքիայի արդարադատության նախարար Բեքիր Բոզդաղի մասնակցությամբ քարոզչական հանրահավաքի անցկացումը արգելվել էր Գերմանիայում: Բոզդաղը մարտի 2-ին սահմանադրական հանրաքվեի քարոզարշավի առնչությամբ պետք է ելույթ ունենար Գերմանիայի Գագգենաու քաղաքում, սակայն վերջին պահին քաղաքապետարանն արգելել էր դրա անցկացումը:
Թուրքիայի արտաքին գործերի նախարար Մևլութ Չավուշօղլուի մասնակցությամբ մարտի 11-ին Հոլանդիայի Ռոտերդամ քաղաքում սահմանադրական փոփոխությունների «այո» թևի պաշտպանության նպատակով կայանալիք հանրաքվեին դեմ էին արտահայտվել նաև Հոլանդիայի իշխանությունները:
Թուրքիայի և հատկապես նրա իշխանական թևի նկատմամբ խիստ դիրքորոշման պատճառը մեկ շաբաթ առաջ Ստամբուլում գերմանական Die Welt պարբերականի լրագրող Դենիզ Յուջելի անհիմն ձերբակալությունն է:
