Նախօրեին մենք գրել էինք, որ նախկին վարչապետ Հովիկ Աբրահամյանին և նախկին գյուղնախարար Սերգո Կարապետյանին պատկանող «Արտֆուդ» պահածոների գործարանում խնդիրներ են առաջացել։ Գրել էինք, որ հարկային մարմինները ստուգումներ են իրականացրել։ Բացի այդ, նշել էինք, որ ֆինանսական խնդիրներ են առաջացել, բանկերը հրաժարվում են վարկեր տրամադրել, և որ առաջիկայում գործարանում կարող են գործ ունենալ ԴԱՀԿ աշխատակիցները։
Մենք փորձել էինք տեղեկությունները ճշտել Սերգո Կարապետյանից, սակայն նա հարցը լսելուց հետո անջատել էր հեռախոսը։ Երեկ մեզ է զանգահարել գործարանի արտադրության գծով տնօրեն Քաջիկ Մարգարյանը և պնդում էր, որ այդպիսի բան չկա։ Գործարանում որևէ ստուգում չի իրականացվել, և իրենք բանկերի հետ ոչ մի խնդիր էլ չունեն։
«Ինֆորմացիան շեղված է, որևէ նման բան չկա։ Մենք նորմալ գործունեություն ենք իրականացնում, մթերման գումարները վճարվում են, վարկային ռեեստրում մենք շատ լավ դասակարգում ունենք, հարկային մարմինները մեզ մոտ չեն եկել։ Վերամշակող ընկերությունը ազգային արժեք է։ Ու բնավ կապ չունի, թե ով է տնօրենը։ Ինչ կապ ունի, որ Հովիկ Աբրահամյանը սեփականատեր է։ Սեփականատերերը կգան ու կգնան, բայց վերամշակող ընկերությունը չի կարելի ներքաշել նախընտրական պատմությունների մեջ»,- ասաց Մարգարյանը՝ հավելելով, որ իրենք երեք հերթափոխով են աշխատում, արդեն իսկ գյուղացիների հետ մթերման պայմանագրեր են կնքել կանխավճարով։
