ՀՀ պաշտպանության նախարարությունում անցկացվեց «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» ՀՀ օրենքի համաձայն ստեղծված «Զինծառայողների ապահովագրության» հիմնադրամի հոգաբարձուների խորհրդի անդրանիկ նիստը: ՀՀ պաշտպանության նախարար Վիգեն Սարգսյանն ընտրվեց հիմնադրամի խորհրդի նախագահ, իսկ հիմնադրամի տնօրեն՝ ՀՀ Կենտրոնական բանկի իրավաբանական վարչության պետ Վարուժան Ավետիքյանը: Հիմնադրամը բաղկացած է 9 հոգուց, որոնցից երեքին ընտրում է Կառավարությունը, երեքին՝ Կենտրոնական բանկը, իսկ մյուս երեքին՝ հասարակական կազմակերպությունները, ովքեր զբաղվում են զինծառայողների պաշտպանությամբ:
Վիգեն Սարգսյանը տեղեկացրեց, որ խորհրդում առկա է մեկ թափուր տեղ, որը զբաղեցնելու է ընդդիմության ներկայացուցիչ: «Հարցը քննարկելով ընդդիմության հետ՝ նպատակահարմար ենք համարել դա թողնել խորհրդարանական ընտրություններից հետո»,- ասաց նա:
Վարուժան Ավետիքյանը ներկայացրեց 2017 թվականի բյուջեն: Այս տարվա համար նախատեսված է 1 միլիարդ 731 միլիոն դրամի ծախս, որը հաստատվեց խորհրդի կողմից:
Նիստի ընթացքում հաստատվեց նաեւ համապատասխան հաստիքացուցակը, որում ընդգրկված են հաշվապահի, կայքէջի պատասխանատուի, ռիսկերի կառավարչի եւ այլ հաստիքներ:
