ԱՄՆ-ը պետք է փոխգործակցի Ռուսաստանի հետ ԼՂ խնդրի կարգավորման գործում։ Նման կարծիք է TASS գործակալության հետ զրույցում արտահայտել Միջազգային հարցրով նյույորքյան խորհրդի փորձագետ, պրոֆեսոր Քերի Կավանոն, ով նախկինում զբաղեցրել է Եվրասիայում հակամարտությունների կարգավորման հարցով ԱՄՆ հատուկ ներկայացուցչի պաշտոնը։ Հուշագրում, որը ուրբաթ տարածվել էր խորհրդին կից Հակամարտությունների կանխման կենտրոնի կողմից, նա նախազգուշացրել է, որ Հարավային Կովկասում բռնության նոր բռնկումը կարող է սպառնալիքի տակ դնել Վաշինգտոնի հարաբերությունները Մոսկվայի, Անկարայի և Թեհրանի հետ։
«Նախագահ Թրամփն արդեն մտադրություն է հայտնել փոխգործակցելու Ռուսաստանի հետ»,-նշել է գործակալության զրուցակիցը,- «ԼՂ կարգավորմանը վերաբերող համատեղ գործողությունները կարող են դառնալ մեկնարկային կետ՝ այլ ոլորտներում երկու երկրների հետագա ջանքերի համար»։
Հուշագիրը պարունակում է խորհուրդ՝ հասցեագրված ԱՄՆ վարչակազմին, ավելի ակտիվորեն շփվելու Ռուսաստանի հետ ԵԱՀԿ Մինսկի խմբի շրջանակում։ «Դա առավել նախընտրելի հարթակ է ռուս-ամերիկյան գործընկերության համար, որտեղ երկու կողմերը կնպաստեն ընդհանուր՝ կասկածի չենթարկվող նպատակների ձեռքբերմանը, դրանք են՝ զինված հակամարտության առաջացման հնարավորությունը նվազագույնի հասցնելը և խաղաղ կարգավորումը»,-կարծում է Կավանոն, ով 1999-2001 թթ եղել է Մինսկի խմբի համանախագահ։
«Սխալ կլինի կարծելը, որ Մինսկի գործընթացն արդյունք չի տվել։ Այն փաստը, որ վերջին շրջանում լայնածավալ հակամատություն չի եղել, ինքնին խոսում է այդ մասին»,-ասել է նա։ Փորձագետը վստահ է տարածաշրջանում վստահության ու անվտանգության ամրապնդմանն ուղղված՝ նախկինում համաձայնեցված միջոցառումները գործնականում կիրառելու անհրաժեշտության հարցում։ Մասնավորապես, խոսքը ԵԱՀԿ դիտորդների թվի մեծացման, շփման գծում միջադեպերի հետաքննման համար անկախ մեխանիզմի ստեղծման մասին է, ինչը կօգնի կրճատել հրադադարի խախտումների թիվը։ «Այդ հակամարտության կարգավորումը բխում է բոլորի շահերից»,-հավելել է Կավանոն։
Լուսանկարը` PAN Photo-ի