«ՀՀ արդարադատության նախարարությանը, ՀՀ իշխանություններին հարմար չի ներկայացնել բանտերում կատարվածի իրական պատկերը: Այն զեկույցները, որ ներկայացնում է դիտորդական առաքելություն ունեցող խումբը, անատամ զեկույցներ են»,- կարծում է Հելսինկյան ասոցիացիայի նախագահ Միքայել Դանիելյանը: Նրա գնահատմամբ, ինչքան քիչ իմանան, թե բանտերում ինչ է կատարվում, այնքան լավ այդ ամենի պատասխանատուների համար:
Նշենք, որ Հայաստանի Հելսինկյան ասոցիացիան, որը չի մտնում դիտորդական առաքելություն ունեցող հանձնաժողովի մեջ, պարբերաբար իրականացնում է մոնիտորինգներ քրեակատարողական հիմնարկներում, հոգեբուժարաններում և այլ հաստատություններում: Եվ մինչ հերթական մոնիտորինգն իրականացնելը, Միքայել Դանիելյանը տեղեկացրեց, որ իրենք նամակով դիմել են նախկին նախարար Գևորգ Դանիելյանին, որը թույլ է տվել մտնել քրեակատարողական հիմնարկներ ու իրականացնել ծրագիրը: Առաջին փուլն ավարտելուց և համապատասխան զեկույցը ներկայացնելուց հետո, ասոցիացիան նամակ է գրել արդեն 2-րդ փուլն իրակացնելու թույլտվություն ստանալու համար, սակայն նրանց մերժել են: ՔՀԿ մամլո քարտուղար Արսեն Բաբայանի պատասխան նամակում նախ նշվել է, որ Հելսինկայն ասոցիացիան չի հանդիսանւմ դիտորդական առաքելություն ունեցող խմբի անդամ, և, բացի այդ, նախորդ մոնիտորինգի արդյունքների ամփոփումը մի շարք մարդկանց օբյեկտիվ դժգոհությունն է առաջացրել, և ծրագրի 2-րդ փուլի իրականացումը համարվում է աննպատակ:
Միքայել Դանիելյանը դժգոհում էր, որ այդ որոշումն ու ներկայացված պատճառաբանությունները անհեթեթ են. թույլտվություն ոչ թե անձերն են տալիս, այլ կառույցը, եթե նախարարը փոխվում է, չի նշանակում՝ նախորդ որոշումն էլ պիտի փոխվի:
Ի դեպ, այդ նամակից հետո մոտ մեկ ամիս առաջ նրանք նորից դիմել են նախարարին համապատասխան պարզաբանում ստանալու նպատակով, սակայն մինչ օրս նրանց չեն պատասխանել: Միքայել Դանիելյանը նշեց, որ իրենք այլևս չեն սպասելու պատասխանին և դատական հայց են ներկայացնելու այս կապակցությամբ:
Լրագրողների հարցին, թե իրավիճակը քրեակատարողական հիմնարկներում այդքան վա՞տ է, որ իրենց արգելում են մտնել և մոնիտորինգ անցկացնել, Հելսինկյան ասոցիացիայի նախագահը պատասխանեց. «Վիճակը ոչ թե վատ է, այլ անտանելի: 2002 թ., երբ մենք և Նորվեգիայի Հելսինկյան կոմիտեն անցկացրիք մոնիտորինգ, մեր զեկույցում նշել էինք, որ գտնվել ՀՀ բանտերում՝ հավասարազոր է խոշտանգման և անմարդկային վերաբերմունքի: Նույն պատկերն է նաև հիմա»։
