Սյունիքի մարզի ընդհանուր իրավասության դատարանում Նապոլեոն Օհանյանի նախագահությամբ ավարտվել է Էրիկ Մարգարյանի գործի դատավարությունը:
33-ամյա Էրիկը աշխատել է ՊԲ զորամասում որպես նյութական ապահովման վաշտի վարորդ: Նա կոչումով շարքային է եղել: Էրիկն ամուսնացած է, խնամքին երեք անչափահաս երեխաներ ունի, հանցավոր արարքը կատարել է մի կնոջ նկատմամբ, ում հետ ինտիմ կապի մեջ է եղել 2005-ից մինչև 2010 թվականը:
Ցանկանալով վերականգնել այդ կնոջ՝ Գայանեի հետ ունեցած նախկին կապը, ըստ մեղադրանքի, Էրիկ Մարգարյանը գնացել է նրա տուն՝ ԼՂՀ Ասկերանի շրջանի Բերքաձոր գյուղ:
Գայանեի հետ նա համաձայնության չի եկել, սկսել է ձեռքերով ու ոտքերով ծեծել նրան ու պատճառել է փայծաղի սուբկապսուլյար վնասվածք:
Մի քանի օր հետո Գայանեի փայծաղը հեռացրել են, այսինքն, առաջադրված մեղադրանքի համաձայն, Մարգարյանն իր գործողություններով տուժողի առողջությանը պատճառել է կյանքի համար վտանգավոր ծանր վնաս, տուժողը կորցրել է օրգանը՝ փայծաղը:
Էրիկ Մարգարյանն ընդհանուր իրավասության դատարանում իրեն մեղավոր չի ճանաչել: Հայտնել Է, որ տուժողի հետ ինտիմ կապի մեջ է եղել մինչև 2010 թվականը: Գայանեն աշխատել է ոմն Վագիֆի խանութում, նրա հետ կապի մեջ է եղել: Իր իմանալով՝ այդ Վագիֆն էր նրան ծեծում:
Վերջին անգամ ինքը Գայանեին տեսել է 2011 թվականի մարտին՝ նրա տան բակում: Գայանեն հայհոյել է իրեն ու պահանջել, որ հեռանա: Դրանից հետո նրան չի հանդիպել, որևէ կապ չի ունեցել: Իմացել է, որ Գայանեին վիրահատել են Վագիֆի կողմից ծեծվելուց հետո:
Տուժող Գայանեն չի հերքել, որ Էրիկի հետ կապ է ունեցել: Հաճախակի վիճաբանել են, ինչի պատճառով իրենց հարաբերությունները վատացել, ապա խզվել են: Էրիկ Մարգարյանի կողմից իրեն անհանգստացնելու, ծեծելու համար նույնիսկ նյութեր են նախապատրաստվել Ստեփանակերտի ռազմական ոստիկանությունում, բայց ինքը ներել է նրան:
Դրանից հետո Էրիկն ալկոհոլ օգտագործած վիճակում մի քանի անգամ եկել է իրենց տուն, առաջարկել է վերականգնել նախկին հարաբերությունները: Ինքն ամեն անգամ մերժել է:
Դեպքի օրն էլ է մերժել, պահանջել է, որ Էրիկը դուրս գա իր տնից: Էրիկը, չհամակերպվելով, վիճաբանել է, ծեծել, իրեն գցել գետնին ու ոտքերով խփել փորին: Հարվածների պատճառով որովայնի շրջանում սուր ցավեր է ունեցել, բայց արտաքին վնասվածք չի եղել, ու ինքը ոչինչ չի ձեռնարկել:
Հաջորդ օրը գնացել է ծնողների տուն, հարազատներին պատմել տեղի ունեցածը: Վախենալով, որ Էրիկը նորից կհայտնվի ու իրեն կծեծի, մոր հետ է վերադարձել իր գյուղ: Բայց առողջական վիճակը կտրուկ վատացել է, իրեն տեղափոխել են Ստեփանակերտի հիվանդանոց, որտեղ վիրահատել ու հեռացրել են վնասված փայծաղը:
Տուժողը հայտնել է, որ Էրիկի կողմից ծեծվելու մասին ինքը շատերին է պատմել: Էրիկն իրեն ծեծել է իր երկու անչափահաս երեխաների աչքի առաջ: Կինը պնդել է, որ բացի Էրիկ Մարգարյանից, որևէ մեկն իրեն չի ծեծել ու վնասվածք չի պատճառել:
Երեխաները, որ Կորնիենկո ազգանունն են կրում, պատմել են, որ Էրիկն իրենց տանը ոտքերով ծեծել է գետնին ընկած իրենց մորը: Իրենք վախեցել են, դուրս են եկել այգի ու գիշերը մնացել են այգում: Հաջորդ օրը մայրը գնացել ու տուն է եկել իրենց տատիկի հետ: Մի քանի օր հետո մայրը վատացել է, նրան տեղափոխել են հիվանդանոց: Երեխաները մի քանի անգամ հարցաքննվել են մանկավարժի ներկայությամբ, վերջինս հայտնել է, որ երեխաներն ամեն անգամ շատ հուզմունքով են վերապրել կատարվածը:
Դատաբժշկական մի քանի փորձաքննությունների եզրակացությունները նույնն են. տուժողի փայծաղի ենթապատյանային հեմատոման, ապա պատռվածքը պատճառվել են սահմանափակ մակերես ունեցող բութ, կոշտ առարկայով, ինչպիսին կարող են լինել բռունցքը, ոտքը: Տուժողի առողջությանը պատճառվել է կյանքին վտանգ սպառնացող ծանր վնաս: Փայծաղի այդպիսի վնասվածքի դեպքում տեղի է ունենում արյան դանդաղ կուտակում փայծաղի պատյանի տակ, մինչև որ պատռվածք է առաջանում: Մասնագետները բացառել են, որ փայծաղի վնասվածքը տուժողը ստանար ընկնելու հետևանքով:
Ընդհանուր իրավասության դատարանը հաստատված է գնահատել Էրիկ Մարգարյանի մեղքը դիտավորությամբ տուժողի առողջությանը ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:
Դատարանը հաշվի է առել, որ ամբաստանյալի խնամքին են 6, 5 և 2 տարեկան երեխաները, և ամբաստանյալն իր ընտանիքի միակ կերակրողն է:
Նման պայմաններում առաջին հերթին հենց ինքը՝ այդ միակ կերակրողը պիտի մտահոգված լիներ ընտանիքի ու երեխաների բարօրությամբ, ոչ թե կողմնակի կանանց իր «իշխանությունն ապացուցեր» ոտքերի տակ գցելով ու փայծաղ պատռելու աստիճան ծեծելով:
Էրիկ Մարգարյանը դատապարտվել է 3 տարի ազատազրկման: Հօգուտ տուժողի՝ նրանից կբռնագանձվի 130 հազար դրամ՝ որպես հանցագործությամբ պատճառված վնասի հատուցում:
