Վրացական «Ռուսթավի 2» հեռուստաալիքը՝ վկայակոչելով իր աղբյուրներին, հաղորդել է Համայն վրաց պատրիարք Իլյա Երկրորդի հնարավոր թունավորման փորձի մասին, ով այժմ Գերմանիայում պատրաստվում է վիրահատության:
Հեռուստաալիքի փոխանցմամբ՝ պատրիարքի անվտանգությունն ուժեղացված է, նրա անվտանգության ծառայության ղեկավարը հարցաքննվել է, իսկ պատրիարքարանի սեփականության կառավարման ծառայության ղեկավարը ձերբակալվել է:
«Հնարավոր է՝ մենք գործ ունենք պատրիարքի թունավորման փորձի հետ: Այս վարկծը տարածում է գտել, սակայն պաշտոնապես դեռ չի հաստատվել»,-հաղորդել է հեռուստաալիքը:
Նշվում է նաև, որ ուրբաթ Թբիլիսիի օդանավակայանում ձերբակալվել է պատրիարքարանի սեփականության կառավարման ծառայության ղեկավար հայր Գեորգի Մամալաձեն: Վերջինս պատրաստվում էր մեկնել Բեռլին՝ պատրիարքի մոտ:
Հեռուստաալիքի աղբյուրները նաև հաղորդել են, որ ձերբակալությունից հետո պետական անվտանգության ծառայության ղեկավար Անզոր Չուբինիձեն մեկնել է Գերմանիա և պատրիարքի անվտանգության ծառայության ղեկավարից պահանջել է վերադառնալ Վրաստան:
