Վրացի լրագրող Իրանի Ջորբենաձեն Rosbalt-ում հոդված է հրապարակել «Ուր են փախչում» հայերը վերտառությամբ:
«Երևանում մտածում են հանրապետության տարածքում ՌԴ Միգրացիոն դաշնային ծառայության «Հայրենակիցներ» ծրագրի դադարեցման մասին՝ դադարեցնելու բնակչության արտագաղթը: Հայերը, սակայն, միայն Ռուսաստան չեն գնում, նրանք սկսել են յուրացնել նաև Վրաստանի բիզնես տարածքը»,- գրում է Ջորբենաձեն:
Նա նշում է, որ Հայաստանում տիրող հանգստությունը, բազմաթիվ և ոչ թանկ սրճարանները, հուշանվերների ու ոսկերչական խանութները՝ որակյա արտադրանքներով, սիրալիր տեղացիները հաճելի են Հայաստան այցելողի համար, սակայն Ադրբեջանի և Թուրքիայի կողմից արգելափակված Հայատանում ապրելը շատ բարդ է:
Նա, հղում անելով պաշտոնական տվյալներին, գրում է, որ Հայաստանի տնտեսական աճն անցած տարի կազմել է 9.5 տոկոս, իսկ արդյունաբերությանը՝ մոտ 15 տոկոս: Սակայն ինչպես հաճախ է տեղի ունենում, պաշտոնական վիճակագրությունը կապ չունի բնակչության կենսամակարդակի հետ: Գործազրկության մակարդակը բարձր է, միջին աշխտավարձը կազմում է մոտ 350 դոլար, իսկ թոշակը՝ մոտ 70 դոլար: Հաջորդ տարի սպասվում է նվազագույն աշխատավարձերի և թոշակների 30 տոկոսով աճ, սակայն բնական գազի, ապրանքների ու ծառայությունների թանկացման համատեքստում այդ փոփոխությունը կարելի է դիտարկել որպես կաթիլ ծովում:
Հայերը գանգատվում են, որ հասարակությունը ծայրաստիճան բևեռացված է. միջին դաս գրեթե չկա, կան հարուստներ ու աղքատներ: Հայաստանի միջին վիճակագրական քաղաքացին սննդի վրա ծախսում է ընտանեկան բյուջեի մոտ 50 տոկոսը,մնացածը գնում է կոմունալ ծախսերի վճարմանը:
Լրագորղը գրում է, որ տունը լքած հայերը տարեկան միջինը հայրենիք են ուղարկում 2 միլիարդ դոլար: Այդ գումարի կեսից ավելին՝ Ռուսաստանից:
Անկախ փորձագետների տվյալներով՝ վերջին 4 տարիներին 3 միլիոնանոց Հայաստանից 320 հազար մարդ է մեկնել, ինչը շատ բարձր ցուցանիշ է նման փոքրաթիվ բնակչություն ունեցող երկրի համար:
Նրանք, ովքեր հասցրել են ինչ-որ բան աշխատել Հայաստանում, ներդրում են իրենց կապիտալը Ռուսաստանում և Վրաստանում: Համարվում է, որ Վրաստանում մրցակցային միջավայրը բարենպաստ է: Հայերը հիանում են հարկային ընթակարգերի պարզությունից, բիզնեսի արագ բացումից, մաքսատանը անօրինական դրամահավաքի բացակայությունից:
