Կահույք արտադրող շվեդական հանրահայտ IKEA ընկերությունը մտադիր է աշխատանքի ընդունել մոտ 200 սիրիացի փախստականների, ովքեր ապրում են Հորդանանի տարածքում, նրանց ներգրավել գորգերի և տեքստիլի արտադրությունում։ Այս մասին հայտնում է CNN-ը։
IKEA-ի թոփ մենեջեր Յեսպեր Բրոդինի խոսքով՝ ապրանքները, որոնք կպատրաստեն փախստականները, կվաճառվեն Մերձավոր Արևելքի երկրներում, որոնք ազատ առևտրային համաձայնագրեր ունեն Հորդանանի հետ։
Ընկերությունում խոստացել են սիրիացի փախստականների համար մշակել աշխատանքի ճկուն գրաֆիկ, քանի որ նրանց շարքում ճնշող մեծամասնությունը կանայք են, որոնց անհրաժեշտ է ժամանակ՝ երեխաների խնամքի համար։
Ինչպես հայտնում է հեռուստաալիքը՝ հղում անելով ՄԱԿ-ի տվյալներին, Հորդանանն իր մոտ ընդունել է ավելի քան 655 հազար փախստականի։
