Կառավարության շենքի դիմաց այսօր նիստից առաջ բողոքի ակցիա էին կազմակերպել մի խումբ ուսանողներ, ովքեր դժգոհում էին ուսման վարձերի բարձրացումից:
Ուսանողներից մեկը «Առաջին լրատվական»-ի հետ զրույցում նշեց, որ իրենք կուսակցական որևէ շահ չեն հետապնդում, պարզապես կարծում են, որ վարձավճարների թանկացման վերաբերյալ որոշումը մի քանի բուհերի ռեկտորներ ապօրինի են կայացրել:
Կառավարության շենքի առաջ նրանք հանդիպեցին կրթության և գիտության նախարար Արմեն Աշոտյանին, որն ուսանողներին խոստացավ ընդունել նախարարության շենքում:
Ուսանողների միջև այս հարցի շուրջ տարակարծություն առաջացավ: Ոմանք կարծում էին, թե նախարարի հետ հանդիպելը սխալ է, իսկ ոմանք էլ, թե պետք է անպայման հանդիպել և պահանջները ներկայացնել: Վերջնական որոշում կայացնելու համար ուսանողները երթով շարժվեցին դեպի Երևանի պետական համալսարան:
Լուսանկարը՝ PanARMENIAN Photo-ի
