«Առաջին լրատվական»-ի զրուցակիցն է Արցախի խորհրդարանի «Վերածնունդ» խմբակցության ղեկավար, ընդդիմադիր պատգամավոր Հայկ Խանումյանը։
– Պարոն Խանումյան, Ձեր գլխավորած կուսակցությունը որոշել է ձևավորել հանրաքվեի շտաբ` սահմանադրական փոփոխությունների նախագծի դեմ քարոզչության համար: Մասնավորապես, ի՞նչ քարոզչության մասին է խոսքը, արդյոք կլինե՞ն հրապարակային միջոցառումներ, հանրահավաքներ, երթեր։
– Հիմնականում իրազեկման միջոցառումներ կլինեն, հանդիպումներ, կփորձենք հնարավորինս արդյունավետ օգտագործել սոցիալական ցանցերն ու լրատվամիջոցները՝ մեր կարծիքը տեղ հասցնելու համար:
– Հասարակության տրամադրություններին ծանո՞թ եք։ Կա՞ արդյոք այնպիսի մեծ դժգոհություն սահմանադրական փոփոխությունների նկատմամբ, ինչպիսին որ կար Հայաստանում։
– Հասարակության տրամադրություններին ծանոթանալու որևէ գործիքակազմ չունենք՝ բացի սոցցանցերի դիտարկումներից, որոնք իրական պատկերը չեն տալիս: Բայց վստահ ենք, որ Արցախի ժողովուրդն ավելի բարձր արժեքների է դավանում, քան Սահմանադրության այս նախագիծը հանրաքվեի դրածները:
– Ո՞ր քաղաքական ուժերի, կազմակերպություններ հետ եք տեսնում համագործակցության հնարավորություն։ ԱԺ-ում նախագիծը հանրաքվեի դնելուն դեմ է քվեարկել նաև Դաշնակցությունը, «Շարժում 88»-ը ՝ձեռնպահ։ Արդյոք կա՞ն համագործակցության եզրեր։
– Եթե ձևավորվեն դեմ քարոզչության այլ շտաբներ, մենք մեծ սիրով կհամագործակցենք նրանց հետ:
– Հայաստանի քաղաքական ուժերից աջակցության ակնկալիք կա՞ այս հարցում։
– Ցավոք, Հայաստանի թե՛ քաղաքական ուժերից, թե՛ քաղաքացիական հասարակությունից իրական սպասելիքներ չունենք, թեև հույս ունենք, որ նրանցից շատերը հրապարակավ կարտահայտվեն այս հարցի շուրջ:
– Սամվել Բաբայանի հետ խոսե՞լ եք այս նախաձեռնության մասին, որևէ մասնակցություն կունենա՞։ Իր դիրքորոշումը սահմանադրական փոփոխությունների մասին Ձեզ հայտնի՞ է։
– Սամվել Բաբայանը ներքաղաքական հարցերին սովորաբար քիչ է խառնվում, եթե, իհարկե, այն չի վերաբերում պաշտպանության բնագավառին: Բաբայանին առավելապես հետաքրքրում են պաշտպանունակության բարձրացման, նոր սպառազինությունների ձեռք բերման ասպարեզները, քան այլ խնդիրներ:
