Սեպտեմբերի 14-ին կայանալիք Փաստաբանների պալատի նախագահի ընտրության համար արդեն իսկ թեկնածուներ են առաջադրվել: Պարզվում է՝ ՓՊ նախագահի ընտրության կարգը հիմնովին փոխվել է:
Այս մասին այսօրվա համարում գրում է «Հրապարակ» օրաթերթն ու հավելում, որ եթե անցյալում փաստաբանները հենց ժողովի ժամանակ էին ընտրում իրենց նախագահին, ապա հիմա դա նմանեցրել են երկրի նախագահի կամ պատգամավորների ընտրությանը:
Նախապես թեկնածուներ են առաջադրում, քարոզարշավ իրականացնում, ապա նշանակված օրը քվեարկում: Երեկ, օրվա վերջում, արդեն առաջադրվել էին ՓՊ փոխնախագահ Արա Ձոհրաբյանը, փաստաբաններ Տիգրան Աթանեսյանը և Աշոտ Թադևոսյանը: Թերթն այս մասին տեղեկացել է փաստաբանների պալատի նախագահ Արա Սահակյանից: Առաջիկա օրերին սպասվում են նոր առաջադրումներ, այդ թվում և Կրոմվել Գրիգորյանի, ով որոշ ժամանակ առաջ «Հրապարակ»-ի հետ զրույցում հավաստիացրել էր, որ անպայման առաջադրվելու է, որպեսզի «Պալատն ավելի լավը դառնա», քան հիմա՝ Սահակյանի ժամանակ է:
Հոդվածն ամբողջությամբ՝ կարդացեք «Հրապարակ»-ի այսօրվա համարում:
