Միչիգանի համալսարանի գիտնականները հետազոտություն են իրականացրել առնետների վրա, որպեսզի պարզեն, թե ինչու են կլինիկական մահվան դեպքում մարդիկ վառ պատկերներ տեսնում:
Նման դեպքերում հիվանդների մեծամասնությունն ասում է, որ շարժվում է թունելով, որի վերջում լույս է վառվում, նրանք հանդիպում են հանգուցյալ հարազատներին կամ տեսնում «այն աշխարհի» վառ պատկերներ:
Հիշելով այս իրադարձությունները՝ մարդիկ ասում են նաև, որ հանգստություն են զգում:
Գիտնականները կրծողների ուղեղում 6 էլեկտրոդներ են տեղադրել, մահացու ներարկումներ են կատարել, ապա չափել են դրանց ուղեղի ակտիվությունն էնցեֆալոգրաֆիայի միջոցով:
Քննելով նեյրոններում տեղի ունեցող տատանվող էլեկտրական գործընթացի գրաֆիկական պատկերը՝ գիտնականները նկատել են ուղեղի գործունեության առկայծում:
«Մենք ցնցված էինք. սրտի կանգից հետո առաջին 30 վայրկյանների ընթացքում ուղեղի տեսողության հատվածում, որտեղ տեսողական կերպարներ են մշակվում, զգալիորեն ուղեղի ակտիվացում նկատվեց: Դա բացատրում է, թե ինչու է հիվանդը տեսնում նման վառ պատկերներ, որոնք մեծ հույզեր են առաջացնում»,- ասել է նյարդաբան Ջիմո Բորջիգինը:
Npr կայքը, սակայն, նշում է, որ այլ գիտնականներ այս փորձարկումն այնքան էլ համոզիչ չեն համարում:
