Հայաստանի Հանրապետության արդարադատության նախարար Արփինե Հովհաննիսյանը դեկտեմբերի 7-ին ընդունել է ԵԽ Մարդու իրավունքների և իրավական հարցերի տնօրինության Արդարադատության և իրավական համագործակցության դեպարտամենտի ղեկավար Հաննա Ջունքերի գլխավորած պատվիրակությանը:
Ինչպես տեղեկացրին ՀՀ արդարադատության նախարարության տեղեկատվության և հասարակայնության հետ կապերի բաժնից, Արփինե Հովհաննիսյանը բարձր է գնահատել Եվրոպական միության և Եվրոպայի խորհրդի հետ համատեղ իրականացված «Հայաստանի արդարադատության համակարգի անկախության, պրոֆեսիոնալիզմի և հաշվետվողականության ամրապնդումը» ծրագրի իրականացման ընթացքն ու դրա շարունակականության հույս հայտնել:
Հանդիպման ընթացքում կողմերը քննարկել են 2014 թվականի հունիսին մեկնարկած և 2016 թվականի դեկտեմբերին ավարտվող վերը նշված ծրագրի ձեռքբերումներին վերաբերող մի շարք հարցեր, ինչպես նաև անդրադարձել ծրագրի երկարաձգման հնարավորությանը:
«Հայաստանի արդարադատության համակարգի անկախության, պրոֆեսիոնալիզմի և հաշվետվողականության ամրապնդումը» ծրագիրն ուղղված էր Հայաստանի արդարադատության համակարգի անկախության ամրապնդմանը, պրոֆեսիոնալիզմի բարելավմանն ու ՀՀ դատական համակարգը եվրոպական չափորոշիչներին համապատասխանեցնելուն միտված ինստիտուցիոնալ և օրենսդրական բարեփոխումներին:
