«Նրանք ովքեր ինչ որ ժամանակ եղել են ՀՅԴ-ում, պատահական չեն եղել, բնականաբար ընդունել են «Դաշնակցության» գաղափարախոսությունը, և անգամ եթե հիմա դուրս են այդ կառույցից, դեռևս այդ գաղափարախոսության կրողներն են, որովհետև դա մարդու հոգու մեջ է,-լրագրողների հետ զրույցում ասաց ՀՅԴ խմբակցության ղեկավար Արմեն Ռուստամյանն՝ անդրադառնալով մամուլի հրապարակումներին այն մասին, որ նախկին ՀՅԴ-ական Ռուբիկ Հակոբյանը 2017թ.-ի ընտրություններին ընդառաջ հնարավոր է վերադառնա ՀՅԴ:
Հարցին, թե այդ դեպքում ինչո՞ւ են լքում ՀՅԴ-ն, եթե շարունակում են գաղափարախոսությանը հավատարիմ մնալ, Ա. Ռուստամյանը պատասխանեց. ««Դաշնակցության» կառույցից շատերն են կարգապահական որոշակի ռեժիմի մեջ չտեղավորվելով՝ դուրս եկել, ինչպես օրինակ՝ Գարեգին Նժդեհը, Անդրանիկը… էսպիսի դեմքեր են եղել, բայց դա չի նշանակում, որ նրանք չեն շարունակել իրականացնել նույն գաղափարախոսությունը»:
Կոալիցիոն գործընկեր ՀՀԿ-ի հետ դաշինք կազմելով ընտրություններին մասնակցելու վերաբերյալ հարցին, Ռուստամյանը պատասխանեց. «Հիմա դժվար է ասել, քանի որ շատ հստակեցումների խնդիրներ, ծրագրեր կան: Այս պահին մեր որոշումը հստակ է՝ մենք ընտրություններին գնալու ենք առանձնաբար»:
Այնուամենայնիվ, Ռուստամյանը չբացառեց, որ ներկայիս որոշումը կարող է և փոխվել. «Ոչ մի բան չի բացառվում»:
Մանրամասները՝ տեսանյութում:
