«Սասնա ծռեր» խմբավորման անդամների և քաղբանտարկյալների հարազատներն այսօր հանդես են եկել համատեղ կոչ-հայտարարությամբ, որում մասնավորապես ասված է. «Հայաստանն ու հայ ժողովուրդը իշխանությունը զավթած, օտար ուժերի ծառայության մեջ գտնվող փոքրաթիվ շերտի և նրա հետ համագործակցող հայաստանյան ու սփյուռքյան քաղաքական որոշակի ուժերի՝ պետականությունը կործանող ազգաքանդ գործողությունների արդյունքում հայտնվել են ծանրագույն ճգնաժամի մեջ:
Համայն հայության շահերը այլ պետության շահերին ստորադասող ներքին ու արտաքին քաղաքականության, անհագուրդ թալանի ու շահագործման հետևանքով համաղետի վերածված աղքատության, համատարած գործազրկության, երբեմնի ծաղկուն գյուղերի դատարկման և քանդման, համատարած անարդարության, անօրինականության, ժողովրդի դեմ կիրառվող մշտական բռնությունների և որպես դրանց արգասիք անխուսափելիորեն մարդաթափության աստիճանի հասած արտագաղթի հետևանքով երկիրն ու ժողովուրդը հայտնվել են աննախադեպ սպառնալիքների դեմ հանդիման…
Իր երկրին ու ժողովրդին նվիրված որևէ գիտակից հայ մարդ չի կարող անտարբեր մնալ այս սողացող կործանման հանդեպ: Ապրիլյան պատերազմ եկավ ապացուցելու, որ դանակն արդեն խրվում է ոսկորի մեջ…
Մեր զավակները, ամուսինները, հայրերն ու եղբայրները, չհամակերպվելով նման կացությանը և ի տես այն փաստի, որ վարչախումբն ու նրա օտար տերերը բացառել են այս իրավիճակի փոփոխության ցանկացած խաղաղ ճանապարհ՝ դիմել են վճռական քայլի, իրենց կյանքն ու բարեկեցությունը դնելով նժարին…
Մենք՝ «Սասնա ծռեր» խմբավորման անդամների և մյուս քաղբանտարկյալների հարազատներս, հավատարիմ ենք մնում նրանց իդեալներին, պահանջներին ու զոհաբերությանը… կոչ ենք անում մեր հայրենակիցներին չհուսահատվել և շարունակել պայքարը, մնալ աննկուն…»:
Մանրամասները՝ տեսանյութում:
