ՀՀ վարչապետ Կարեն Կարապետյանը գործադիրի նիստում անդրադարձել է Տնտեսական մրցակցության պաշտպանության պետական հանձնաժողովի որոշմանը, որի համաձայն՝ գերիշխող դիրքի չարաշահման համար ընկերությունը տուգանվեց 110 միլիոն դրամով:
Նրա խոսքով՝ հանձնաժողովը օրենքով ստեղծված անկախ մարմին է, և կառավարությունն այստեղ ազդեցության լծակներ չունի, բայց դա, ըստ նրա, չի զրկում իրենց կարծիք արտահայտելու հնարավորությունից: «Ուստի, պարոն Շաբոյանին և ՏՄՊՊՀ-ին հորդորում ենք իրենց ջանքերն առաջին հերթին կենտրոնացնել առաջնային սպառման ապրանքների շուկային, որի վերաբերյալ հասարակությունից հնչող մտահոգություններն ավելի շատ են»,- ասել է վարչապետը:
Կարեն Կարապետյանը նշել է, որ դա շատ ավելի առաջնահերթ խնդիր է, քան գարեջրի արտադրության բնագավառը, որտեղ կան մեծ թվով գարեջուր արտադրողներ և ներմուծողներ, կա լուրջ մրցակցություն: «Ես հանդիպել եմ այդ գործարարների հետ, իրենք հիմնավորում են, որ շահութաբաժինը առավել չեն դրել: Այդ իսկ պատճառով խնդրում եմ՝ մաքսիմալ ուշադիր վերաբերվել այս հարցերին»,- նշեց վարչապետը:
