ԱՄՆ նախագահ Բարաք Օբաման փորձել է համոզել իր թուրք գործընկեր Թայիփ Էրդողանին վերանայել Անկարայի դիրքորոշումը սիրիական Ռաքքա քաղաքի ազատագրմանը սիրիացի քրդերի ինքնապաշտպանական ուժերի (YPG) մասնակցության հարցում։ Այս մասին հաղորդում է Reuters գործակալությունը՝ վկայակոչելով ամերիկացի բարձրաստիճան պաշտոնյաներին։ Հոկտեմբերի վերջին Թուրքիայի վարչապետ Բինալի Յըլդըրըմը հայտարարել է, որ իր երկիրը պատրաստ է աջակցել ԴԱԻՇ-ից Ռաքքայի ազատագրմանը, եթե գործողությանը չմասնակցեն սիրիացի քրդերի ինքնապաշտպանական ուժերը։
Բարձրաստիճան պաշտոնյաների տվյալներով՝ հոկտեմբերի վերջին Օբաման ավելի քան 2 ժամ հեռախոսով զրուցել է Էրդողանի հետ այս թեմայի շուրջ։
Գործակալության փոխանցմամբ՝ սիրիացի քրդերի ինքնապաշտպանական ուժերի ջոկատները ԱՄՆ-ի գլխավոր դաշնակիցներն են ԴԱԻՇ-ի դեմ պայքարում։ Անկարան իր հերթին YPG-ը համարում է ահաբեկչական կազմակերպություն, որը կապված է Թուրքիայում արգելված Քրդական աշխատավորական կուսակցության (PKK) հետ։
«Մեզ համար առանցքային է, որպեսզի թուրքերը զսպվածություն ցուցաբերեն և չգայթակղվեն՝ անելու այնպիսի բան, որն ավելի կբորբոքի հակամարտությունը»,-ասել է գործակալության աղբյուրներից մեկը։
Բարձրաստիճան պաշտոնյաների կարծիքով՝ ԴԱԻՇ-ի դեմ պայքարը Թուրքիայի նախագահի առաջնային խնդիրը չէ։ Մեծ հաշվով նա ձգտում է թույլ չտալ, որպեսզի YPG-ը միավորի քրդական տարածքներ Սիրիայի հյուսիսում՝ ստեղծելով դե-ֆակտո պետություն, ինչն էլ կարող է ուժեղացնել PKK-ն։
Ինչպես նշում է գործակալությունը, ներկայում յուրատեսակ պայքար է ընթանում Սիրիայի հյուսիսում Ալ-Բաբ քաղաքը գրոհայիններից ազատագրելու համար։ Եթե հաղթանակ տանեն թուրքական զորքերի կողմից աջակցություն ստացող ուժերը, քրդերը կարող են հրաժարվել Ռաքքայի ազատագրմանը մասնակցությունից, ինչը կարող է արմատապես փոխել իրադարձությունների ընթացքը Սիրիայում։
