Ստամբուլի հայկական «Ակօս» թերթի փոխանցմամբ՝ քրդամետ «Ժողովուրդների դեմոկրատիա» կուսակցության համանախագահ Սելահաթթին Դեմիրթաշը կալանավորումից առաջ տեղափոխվել է դատարան, ուր չի պատասխանել իրեն ուղղված հարցերին ։
Իր ցուցմունքի ժամանակ Դեմիրթաշը նշել է․ «Առաջադրված մեղադրանքի հետ կապված հարցերին պատասխանել չեմ ցանկանում։ Փոխարենը՝ ինքս մի հայտարարություն կանեմ։
Մենք ժողովրդի ընտրված ներկայացուցիչներն ենք։ Մենք մեր անձը չենք ներկայացնում, այլ մեզ ընտրած զանգվածներին։ Այժմ էլ անձեռնմխելիության իրավունքի տեր մեկն եմ, խորհրդարանի անդամ։ Ձեր առաջ կանգնած եմ որպես պատգամավոր։
Չեմ կարող թույլ տալ, որ ժողովրդի կամքը ոտնահարվի։ Արդար և անկողմնակալ դատական համակարգի առջև պատասխան տալուց ամենևին չեմ խուսափում։ Այնպիսի բան չկա, որի պատասխանը չունենամ։
Երկրում ոտնատակ արվող դատական համակարգին ենթակա մեկը չեմ լինի։ Ձեր անձի և ինքնության դեմ կասկած չունեմ և անարգանք չեմ տածում։ Սակայն անցյալի վրա շատ բծեր ունեցող Էրդողանի հրամանով սկսած այս դատական թատերական խաղի տիկնիկը չեմ դառնա։
Ձեր ոչ մի հարցին չեմ պատասխանելու։ Ձեր իրականացնելիք ոչ մի դատական գործողության արդարացիությանը չեմ հավատում։ Ինձ բերման ենթարկելն անգամ ապօրինություն է։
Քաղաքական գործիչները քաղաքական դաշտում ոչ թե դատական համակարգի, այլ քաղաքական գործիչների հետ գործ ունեն։ Այս առումով, դուք՝ դատական համակարգի ներկայացուցիչներդ, ովքեր պետք է հավատարիմ լինեն միջազգային և ժողովրդավարական դատական սկզբունքներին և Թուրքիայի անդամակցած միջազգային պայմանագրերին, պետք է հրաժարվեք քաղաքական խաղերի մասը կազմելուց։
Ձեզանից պահանջներ և ակնկալիքներ չունեմ։ Իմ քաղաքական գործունեության հետևանքով ինձ հարցաքննել կարող են միայն ինձ ընտրողները»։
