Ռուսաստանում 18 մարդու մահվան պատճառ դարձած վթարի մեջ մեղադրվող ՀՀ քաղաքացի, ազատամարտիկ Հրաչյա Հարությունյանի որդու՝ Սերոբ Հարությունյանի, գերեզմանն արդեն կառուցման փուլում է:
Հարությունյանների ընտանիքի պատմությունը՝ Սերոբ Հարությունյանի անժամանակ մահը, Հրաչյա Հարությունյանին կանացի խալաթով դատարանի դահլիճ բերելու հանգամանքն ու այն փաստը, որ Հրաչյա Հարությունյանն, ով այսօր ամբաստանյալի աթոռին է հայտնվել, Ռուսաստան արտագնա աշխատանքի էր մեկնել, որպեսզի վաստակած գումարով կարողանար կառուցել 21-ամյա որդու գերեզմանը, որևէ մեկին անտարբեր թողնել չէր կարող:
Հայաստանում այս ընտանիքի պատմության բացահայտումից հետո շատերն են ցանկացել օգնել ընտանիքին ինչով կարող են, գտնվել են նաև այնպիսիք, որոնք ցանկացել են Սերոբ Հարությունյանի գերեզմանի ծախսերը հոգալ: Այս մասին «Առաջին լրատվական»-ի հետ զրույցում տեղեկացրեց Հրաչյա Հարությունյանի դուստրը՝ Լիլիթ Հարությունյանը: Նա տեղեկացրեց, որ այսօր իր եղբոր՝ Սերոբ Հարությունյանի, գերեզմանն արդեն կառուցման փուլում է: Հրաչյա Հարությունյանի դուստրն ասաց, թե չգիտի՝ որքան գումար կպահանջվի գերեզմանի կառուցման համար, միայն գիտի, թե ովքեր են ցանկություն հայտնել ֆինանսավորել այդ աշխատանքները:
«Գերեզմանի ծախսերի մի մասը՝ կեսը, ֆինանսավորում է ՀՖՖ նախագահ Ռուբեն Հայրապետյանը, իսկ մյուս մասը՝ Ռուսաստանի հայերի միության ղեկավար Արա Աբրահամյանը: Հիմա նորմալ կառուցվում է»,- տեղեկացրեց նա: Վերջինս այլ մանրամասներ չկարողացավ հաղորդել:
Հիշեցնենք, որ Ռուսաստանում 18 մարդու մահվան պատճառ դարձած վթարի մեջ մեղադրվող Հրաչյա Հարությունյանի որդին՝ Սերոբ Հարությունյանը, գլխուղեղի ուռուցքից մահացել էր բանակից զորացրվելուց մեկ տարի անց՝ 2012թ. մայիսին: Նրա հարազատները կարծում են, որ տղան հիվանդությունը ձեռք է բերել ծառայության ընթացքում՝ հրամանատարների անմարդկային վերաբերմունքի պատճառով: Իսկ Հրաչյա Հարությունյանը մեկնել էր Ռուսաստան՝ բանակում զոհված որդու շիրմաքարի և գերեզմանի կառուցման համար գումար վաստակելու նպատակով, որի ընթացքում էլ վարելով «ԿամԱԶ» մակնիշի բեռնատար՝ մեծ արագությամբ բախվել էր ավտոբուսի։ Վթարի հետևանքով 18 մարդ էր զոհվել, այդ թվում՝ մեկ երեխա, ընդհանուր առմամբ տուժել էր շուրջ 50 մարդ:
