«Այնպես չէ, որ նախորդ ծրագրերը վատն են եղել, և դրա պատճառով է, որ այսօր այս վիճակն է երկրում ստեղծվել: Ես դեռ վատ ծրագիր չեմ կարդացել: Եթե գրվածի գոնե կեսը կատարվեր, այսօր բոլորովին այլ երկրում կլինեինք՝ սկսած ընտրական պրոցեսներից, վերջացրած կոռուպցիայի մակարդակով»,- կառավարության ծրագրի շուրջ «Առաջին լրատվական»- ի հետ զրույցում նշեց «Ժառանգություն» կուսակցության փոխնախագահ Արմեն Մարտիրոսյանը՝ անդրաառնալով հարցին, թե ինչքանո՞վ է նոր կառավարության ծրագիրը հույս ներշնչում, և արդյո՞ք այս ծրագրի գոնե բարեհաջող դրույթները կյանքի կկոչվեն:
Ծրագրում նշված է, որ լրջագույն փոփոխությունների կարիք կա, և բոլորով՝ ամբողջ ազգով պետք է համախմբվենք: Սաայն, ըստ Ա. Մարտիրոսյանի, այդ ուղղությամբ որևէ քայլ չի կատարվում. «Ունենք հասարակություն, որը բոլորվին հեռու է իշխանությունից, կառավարման համակարգից, ունենք սփյուռք, նախկինում եթե շատ ջերմ էին հարաբերությունները, հիմա այդ ջերմությունը չկա, դա ակնհայտ երևում է Համահայկական հիմնադրամի հանգանակություններից, և ունենք իշխանություն, որ իրավիճակից ելնելով՝ փոփոխությունների է գնացել»:
Ա. Մարտիրոսյանի խոսքով՝ իրական բարեփոխումների համար միայն վարչապետը և կառավարության անդամները չէ որ պետք է փոխվեն, անհրաժեշտություն կա փոխելու ամբողջ դատական համակարգը, այն պետք է անկախ լինի. «Իրավապահ մարմինները նույնիսկ ոչ թե կրիմինալի, այլ խուժանի հետ համագործակցաբար աշխատում են և քաղաքացի են ծեծում, աչքովս եմ տեսել: Հիմա ես ինչպե՞ս պատկերացնեմ, որ այդ իրավապահ մարմինները կառավարության հետ պետք է այդ նույն քաղքացու շահը պաշտպանեն, այդ թվում նաև ՓՄՁ-ների շահը և այլն: Չկա ադպիսի բան: Եթե այդ հիվանդությունը, մետաստազները բոլոր օղակների մեջ տարածվել են, և ենթադրենք թե կառավարությունը առողջ է (որն իրականում այդպես էլ առողջ չդարձավ), ընդհանուր համակարգը ինչպե՞ս կարող է առողջ լինել. չի կարող, որովհետև նրա կատարած քայլերը հիվանդ օղակների մեջ տարալուծվելու են: Ոստի և կառավարության ծրագիրը մնում է ծրագիր, իմիջիայլոց ժողովրդավարության մասին էլ խոսք կար ծրագրում, տնտեսական կոնկրետ թիրախներ չկան նշված, սա ժամանակավոր կառավարություն է, սա բերված է նրա համար որպեսզի 2017-ին ՀՀԿ-ն մի փոքր ավելի լավ վիճակով գա ընտրություններին, կարճաժամկետ կարող է իրագործվեն որոշ քայլեր, բայց երկարաժամկետ կտրվածքով ունենալու ենք այն իրավիճակը, ինչ ունեցել ենք»:
Մանրամասները՝ տեսանյութում:
