Այսօր ՀԱԿ խմբակցության ղեկավար Լեւոն Զուրաբյանը ԱԺ-ում լրագրողների հետ զրույցում անդրադարձավ առաջին նախագահ Լևոն Տեր-Պետրոսյանի հայտարարությանը, որ մեզ սպառնում է տնտեսական աղետ՝ թաքնված դեֆոլտ: Դիտարկմանը, որ Լևոն Տեր-Պետրոսյանի այդ հայտարարությունը միանշանակ չընդունվեց, Լեւոն Զուրաբյանն արձագանքեց. «Իսկ դուք գիտե՞ք Տեր-Պետրոսյանի որեւէ ելույթ, որն ընդունվել է միանշանակ մեր հանրության կողմից: Ես չեմ հիշում»: Լեւոն Զուրաբյանը չցանկացավ մեկնաբանել, թե ում էր ուղղված առաջին նախագահի այդ ուղերձ-զգուշացումը:
Լեւոն Տեր-Պետրոսյանը ընտրական գործընթացը համարում թատերականացված՝ ԸՕ վերջին համաձայնություններից հետո՝ Լեւոն Զուրաբյանը պարզաբանեց. «Նա մտադրություն չուներ խոսել այն համաձայնագրի մասին, որը ձեռք է բերվել 4+4+4 ձեւաչափին: Իր ասածը վերաբերվում էր բացառապես ԿԸՀ-ի վարկաբեկված կազմի նշանակմանը, ինչպես նաեւ Գյումրիում եւ Վանաձորում կեղտոտ ընտրությունների անցկացմանը, որոնք չեն նպաստում ընտրությունների նկատմամբ վստահության բարձրացմանը»:
Լեւոն Զուրաբյանն ընդգծեց, որ «եթե կան միամիտներ, որոնք կարծում են, որ համաձայնագիր ստորագրելով՝ իշխանությունները այսուհետեւ լինելու են հրեշտակներ, որոնց միակ նպատակն է ՀՀ-ում ազատ եւ արդար ընտրությունների անցկացումը, ես այդ բոլոր միամիտներին պատրաստ եմ հիասթափեցնել, նման բան չի լինի: Բոլորս էլ գիտենք, որ հրեշտակներ չեն: Դրան գնացել են, որովհետեւ եղել է լուրջ քաղաքական աշխատանք եւ ճնշումներ ընդդիմության, միջազգային հանրության կողմից»:
Հարցին, երբ դեֆոլտի ի՞նչ նախանշաններ կան՝ Լեւոն Զուրաբյանը պատասխանեց. «Բոլորն էլ գիտեն, որ բյուջեում փող չի հավաքվում, գիտեն, որ արդեն բյուջեի 10 տոկոսը գնում է պետական պարտքի սպասարկմանը, շատ շուտով այդ թիվը լինելու է մինչեւ 30 տոկոս: Մենք ունենք մի երկիր, որտեղ պետական պարտքը 10 մլրդ դոլարանոց ՀՆԱ-ի պայմաններում հասել է 6 մլրդ դոլարի: Զարգացման որեւէ միտում չկա: Չկա որեւէ նախադրյալ, որն այդ դինամիկան կշրջեր»:
ՀԱԿ խմբակցության ղեկավարը նշեց, որ լավ կլիներ, որ Ազգային Ժողովի ընտրություններից առաջ ընդդիմադիր ուժերը միավորվեին, ՀԱԿ-ը պատրաստ է դրան. Նա ասաց, որ խորհրդարանական ընտրությունները ճակատագրական են լինելու՝ որոշվելու է՝ Հայաստանը շարունակելո՞ւ է մնալ ճահճի մեջ, թե՞ դուրս է գալու. «Միասնականությունը լավ բան է, շատ լավ եմ վերաբերվում, բայց այդ միասնականությունը չպիտի լղոզի եւ բարդացնի ընդդիմության վճռական եւ արդյունավետ գործելու կարողությունը: Միասնականությանը պետք է հասնել: 2 տարբերակ կա միասնականության: Մի դեպքում, երբ քաղաքական ուժերով միավորվում ենք, բայց այդ դեպքում պետք է փոխընդունելի լուծումներ գտնենք, մյուս դեպքում այն է, որ ՀԱԿ-ը դառնա մի պլատֆորմ, որտեղ բոլոր քաղաքական, հասարակական նախաձեռնությունները, քաղաքական գործիչները, առանձին անհատներ, հաշվի առնելով նոր ԸՕ-ի հատկությունները, կարողանան իրենց այդտեղ դրսեւորել: Մենք տեսնում ենք այդ տարբերակը»:
Մանրամասները՝ տեսանյութում:
