Հոկտեմբերի 2-ին Հայաստանի 6 մարզերի 377 համայնքներում կայացած ՏԻՄ ընտրություններում «Քաղաքացի-դիտորդ» նախաձեռնության ներկայացուցիչները արձանագրել են 190 ընտրախախտում։ Այս մասին այսօր տեղի ունեցած մամուլի ասուլիսում լրագրողներին հայտնեց «Քաղաքացի-դիտորդ» նախաձեռնության ներկայացուցիչ Տիգրան Եգորյանը։ «Քաղաքացի դիտորդ» նախաձեռնությունը հոկտեմբերի 2-ի ՏԻՄ ընտրությունների ժամանակ դիտորդական առաքելություն է իրականացրել 18 համայնքներում, ունեցել է 230 դիտորդ։
Արձանագրվել են ընտրախախտումների հայտնի գրեթե բոլոր տեսակները. «Ցուցակների անճշտություններ, ցուցակներում մահացած անձանց անուններ, մահացած մարդկանց փոխարեն քվեարկության դեպքեր, կաշառքի դեպքեր, դիտորդների իրավունքների խախտումներ՝ հանձնաժողովի անդամների ու նախագահների կողմից, ուղղորդումներ, քվեարկության նկատմամբ հսկողություն սահմանման փորձերի և տեղամասից քվեաթերթիկ հանելու դեպքեր, անհետացել են դրոշմակնիքներ …»,- նշեց Տ. Եգորյանը,: -Անկախ նրանից՝ անձը բացակայում է հանրապետությունից, թե ոչ, ապահովվում են այլ անձանց փոխարեն քվեարկություններ»:
«Քաղաքացիական դիտորդ» նախաձեռնության ներկայացուցիչների խոսքով՝ ընտրախախտումների մեծ մասի պարագայում պատասխանատու մարմինները համապատասխան քայլեր չեն ձեռնարկում, որի արդյունքում դրանք դառնում են շարունակական։ Իր պարտականությունները պատշաճ կերպով չի իրականացնում նաև ԿԸՀ-ն։
«ԿԸՀ հակահարձակ հայտարարություններն այն մասին, որ արձանագրված ընտրախախտումները չեն ազդում ընտրությունների արդյունքների վրա, խոսում է միայն մեկ փաստի մասին, որ այս հանձնաժողովը չունի որևէ անկախություն, և քվեարկության ընթացքում արդեն ունի դիրքորոշում, որ բոլոր խախտումները էական նշանակություն չունեն։ Այսպիսի եզրահանգում անելու համար ԿԸՀ-ն ունի առնվազն 5-6 օր, և պետք է իրականացնի արդյունավետ քննություն ու օպերատիվ միջոցներով փաստերի պարզում, որոնք հետագայում հնարավորություն կտան գնահատել այս կամ այն տեղամասում ընտրախախտումների ազդեցությունը քվեարկության արդյունքների վրա»,- նշեց «Քաղաքացի-դիտորդ» նախաձեռնության ներկայացուցիչը։ Նախաձեռնության ներկայացուցիչների կարծիքով՝ ԿԸՀ-ն ունակ չէ ու պատրաստ չէ ապահովել ազատ և արդար ընտրությունների անցկացման իր պարտականությունը, և ԿԸՀ կազմը պետք է օր առաջ ցրել:
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը, խոսելով կոնկրետ Գյումրիում և Վանաձորում տեղի ունեցած ընտրությունների մասին՝ դրանք որակեց որպես խայտառակ:
Մանրամասները՝ տեսանյութում:
