«Վարչապետ փոխելով՝ որևէ հարց չի լուծվում, ուղղակի հիմա փորձում են պատրանք ստեղծել, որ իբր նախարարները ՀՀԿ-ականներ չեն, օլիգարխներ չեն, կողքից բերված մարդիկ են, բայց այդ ամենը արվում է ընդամենը նախընտրական շրջանում ժողովրդի դժգոհությունը մեղմելու նպատակով: Ես վստահ եմ, որ մենք գործ ունենք նույն իշխող ռեժիմի հետ,- «Առաջին լրատվական»- ի հետ զրույցում ասաց ՀԱԿ խմբակցության ղեկավար Լևոն Զուրաբյանը՝ հավելելով, որ համակարգային առումով որևէ բան չի փոխվել:
Անդրադառնալով դիտարկմանը, որ նորանշանակ վարչապետ Կարեն Կարապետյանը հանձնարարել է գազի և էլեկտրաէներգիայի սակագները վերանայել, Լևոն Զուրաբյանը նշեց, որ այդ քայլի նպատակը ևս տեղավորվում է ծրագրի շրջանակներում, այսինքն՝ պատրանք ստեղծել, որ ամեն ինչ փոխվում է դեպի լավը. «Ընտրություններից առաջ փորձում են պատրանք ստեղծել, որ գները նվազեցնում են, սակայն հենց որ ընտրություններն անցնեն, վստահ եղեք, որ այդ գները սրընթաց կբարձրանան»:
Լևոն Զուրաբյանը նոր կառավարությունից որևէ ակնկալիք չունի: Նրա խոսքով՝ որևէ պատրանք ոչ ոք չպետք է ունենա, խնդիրները կարող են լուծվել, եթե իշխանության գա որևէ քաղաքական ուժ, որն ունի ժողովրդի աջակցությունը և պատրաստ է համակարգային փոփոխություններ իրականացնել՝ ելնելով ժողովրդի շահերից:
Լ. Զուրաբյանի դիտարկմամբ՝ քաղաքականության մեջ հաղթում է նա, ով հետևողական և սկզբունքային է. «Կարծում եմ՝ մենք հասնելու ենք ժողովրդավարության հաստատմանը: Հարթել ենք ճանապարհը դեպի դեմոկրատական իշխանափոխություն: Վստահ եմ, որ մեր խմբակցությունը չի կարող քվեարկել անփոփոխ մնացած այս քաղաքական հենարանի վրա հիմնված կառավարության ծրագրի օգտին»:
Մանրամասները՝ տեսանյութում:
