Ամբողջ աշխարհը քննարկում է Ֆրանսիայի նախագահ Նիկոլա Սարկոզիի և նրա կնոջ՝ Կարլա Բրունիի կյանքում տեղի ունեցած կարևոր իրադարձությունը` Կարլան հղի է: Առաջատար լրատվամիջոցներն ամեն օր այս թեմայով հոդվածներ են հրապարակում: Հարցազրույցներ են տալիս Սարկոզիի և Բրունիի ծնողները:
Սարկոզիի ընտանիքին այս իրադարձությունը ոչ միայն երջանկություն է բերել, այլ ունի նաև հստակ գործնական բնույթ,- գրում են ֆրանսիական թերթերը: Բոլորին է հայտնի, որ 2012 թ. նախագահական ընտրություններից մեկ տարի առաջ Նիկոլա Սարկոզիի վարկանիշն անչափ ցածր է: Հարցման արդյունքներով պարզվել էր, որ նա ոչ միայն 20%-ից պակաս ձայներ ունի, այլ նույնիսկ երկրորդ փուլ չի անցնում: Սակայն վերջին օրերի զարգացումները բավական շտկել են իրավիճակը:
Հարցման ժամանակ նա երրորդ տեղ էր գրավել` զիջելով Արժույթի միջազգային հիմնադրամի ղեկավար Դոմինիկ Ստրոս Կանին և ազգայնական Մարին Լե Պենին: Սակայն իրավիճակը սկսեց շտկվել երեխայի մասին լուրից հետո: Իսկ Նյու Յորքում Դոմինիկ Ստրոս Կանի ձերբակալությունը, որտեղ նրան մեղադրում են բռնաբարության մեջ, ավելի լավ ընթացք չէր էլ կարող ապահովել Նիկոլա Սարկոզիի համար:
