Բրազիլական Սան Պաուլու քաղաքում ցուցարարները, ովքեր դեմ են հանդես գալիս նախագահ Դիլմա Ռուսեֆի իմփիչմենթին, բախվել են ոստիկանության հետ։
Globo հեռուստաալիքի տվյալներով՝ անկարգությունները սկսվել են բրազիլական խոշորագույն քաղաքի կենտրոնում։ Ոստիկանությունը Ռուսեֆի կողմնակիցների դեմ արցունքաբեր գազ և լուսաձայնային նռնակներ է կիրառել։ Ի պատասխան՝ ոստիկանների ուղղությամբ նետվել են քարեր և նույնիսկ ինքնաշեն ռումբեր։
Ցուցարարները աղբի տոպրակներով փակել են երթևեկությունն ու վառել դրանք, ինչպես նաև վնասել բանկերից մեկի մասնաճյուղը։
Երեկ սենատորները ձայների մեծամասնությամբ հեռացրել էին Ռուսեֆին պարտականությունների կատարումից։ Ռուսեֆը նման գործողությունն անվանել էր խորհրդարնական հեղաշրջում և խոստացել շարունակել քաղաքական գործունեությունը։ Նախագահի պարտականությունները ստանձնել է Միշել Թեմերը։ Նա կղեկավարի Բրազիլիան մինչև 2018 թվականի վերջ, երբ էլ կանցկացվեն ընտրությունները։
