Երեկ ԿԸՀ նիստում պարզ դարձավ, որ մերժվեցին Ընտրական օրենսգրքում փոփոխությունները, և առաջիկա համապետական ընտրություններում դրանք կյանքի չեն կոչվելու:
ԱԺ ՀՀԿ խմբակցության ղեկավար Վահրամ Բաղդասարյանը այս առնչությամբ նկատեց. «Բավականին երկար քննարկումների արդյունքում «4+4+4» ձևաչափը գալիս էր համաձայնության: Եվ միջազգային կառույցների բանավոր խոստումների հիման վրա մենք սկսեցինք բանակցությունները տեխնիկական վերազինման համար: Սակայն, ինչպես գիտեք, լիազորված լեհական կողմը հայտարարեց, որ այդ ժամկետներում իրենք հնարավորություն չունեն դրանք տեղադրելու, և բոլորս կանգնեցինք փաստի առջև»:
Այնուամենայնիվ, Վահրամ Բաղդասարյանը համոզված է, որ եթե ոչ՝ այս ընտրություններում, ապա ապագայում իրենք դրանք կյանքի կկոչեն:
Նրա խոսքով՝ քննարկումները, այնուհանդերձ, շարունակվում են, և 2 օրից կհնչի հայտարարություն լուծումների վերաբերյալ:
«Մենք ի սկզբանե կողմնակից չենք եղել ընտրողների ցուցակների հրապարակմանը, մենք կողմնակից ենք ավելի ժամանակակից միջոցների ներդրմանը, ինչը, ցավոք սրտի, կյանքի չկոչվեց»,- ասաց ՀՀԿ խմբակցության ղեկավարը:
Մեր զրուցակցի կարծիքով՝ հանրությունը ըմբռնումով կվերաբերվի այն փաստին, որ ԸՕ-ում ընդունված տեխնիկական փոփոխությունները, փաստորեն, կյանքի չկոչվեցին. «Մեզ համար ավելի ընդունելի էր այս տարբերակը, իսկ եթե մենք գնանք ցուցակների հրապարակման տարբերակով, այդտեղ նորից պետք է լինեն խոչընդոտներ, շահարկումներ: Ուստի մենք պետք է գտնենք այնպիսի մեխանիզմներ, որպեսզի կարողանանք բացառել նաև հետագա շահարկումները»:
