Նյու Յորքի համալսարանի Macaulay Honors քոլեջի ղեկավաությունն իջեցրել է ԿԸՀ նախկին նախագահ Դևիդ Պետրեուսի աշխատավարձը` տարեկան 200 հազարից հասցնելով 1 դոլարի: Պատճառը Պետրեուսի նկատմամբ քոլեջի մյուս դասախոսների քննադատությունն է եղել։ Այս մասին գրում է New York Times-ը:
Դևիդ Պետրեուսը հրավիրյալ պրոֆեսորի պաշտոն քոլեջում ստացել էր այս տարվա ապրիլին: Ենթադրվում էր, որ ուսումնական հաջորդ տարվա սկզբից նա կվարի երկու սեմինար և երկու բաց դասախոսություն կկարդա: Լրագրողների ձեռքում հայտնված փաստաթղթերի համաձայն՝ ԿՀՎ նախկին ղեկավարի վճարը տարեկան պետք է կազմեր 150-200 հազար դոլար: Իդեպ, քոլեջի` ծանրաբեռնված դասաժամերով աշխատող դասախոսների տարեկան միջին աշախատավարձը կազմում է 90 հազար դոլար:
«Փողը երբեք պատճառ չի եղել, որպեսզի Պետրեուսը համաձայնի այդ պաշտոնին: Երբ գումարի հետ կապված հակասություններ են առաջացել, նա որոշել է, որ առավել կարևոր է կենտրոնանալ ուսանողների և ուսումնական գործընթացի վրա` թույլ չտալով ֆինանսական հարցին հայտնվել ուշադրության կենտրոնում»,- հայտարարել է Պետրեուսի փաստաբանը:
Պետրեուսն ավելի քան 35 տարի ծառայել է ամերիկյան բանակում` հասնելով «չորս աստղով» գեներալի աստիճանի: 2011-2012 թթ. ղեկավարել է ԿՀՎ-ն: Նա պաշտոնաթող էր եղել 2012-ի նոյեմբերին՝ այն բանից հետո, երբ հայտնի էր դարձել լրագրողի հետ նրա սիրային պատմության մասին:
