Կարծիքներ կային, որ «Սասնա ծռեր»- ի գործողությունները միանշանակ փաստում են Հայաստանում ընդդիմության տապալման մասին, սակյան ընդդիմադիր ուժերը շարունակում են նույն մարտավարությունը, պատրաստվում են նաև ՏԻՄ ընտրություններին, քարոզարշավ են սկսել: Անդառնալով «Առաջին լրատվական»- ի այս դիտարկմանը անկախ փորձագետ Հայկ Բալանյանը նշեց. «Տապալվել է առաջին հերթին այն քաղաքականությունը, որը վարում էր իշխանությունը՝ քաղաքական դաշտը ոչնչացնելու, ընդիմության համար լեգիտիմ, օրինական ճանապարհը և հնարավորությունները վերացնելու համար: Եվ այն, ինչ տեղի ունեցավ, դա ուղղակի հետևանքն է քաղաքական դաշտը փակելու, այսպես ասած, կաթսան լիովին վերահսկելու քաղաքականության, և կաթսան պայթեց»:
«Սասնա ծռեր»- ի գործողությունը, փորձագետի դիտարկմամբ, ապստամբության փորձ էր. «Տարիներ ի վեր Նախախորհրդարանը, Հիմնադիր խորհրդարանը, Ժիրայր Սէֆիլյանը հայտարարում էին, որ ընտրություններով քաղաքական հարցերը Հայաստանում չեն լուծվում: Իշխանությունը ամեն տարի ապացուցում էր, որ իսկապես ընտրություններով «իրենց դեմ խաղ չկա», և մենք ստացանք եթե ոչ ընտրություններով, ապա այս ձևով քաղաքական պայքար վարելու փորձ: «Սասնա ծռեր»- ի գործողության մասին մենք հիմա ամեն ինչ չենք կարող ասել, ինչ-որ ժամանակ հետո վերջնական եզրակացություններ կարող ենք անել, որովհետև դեռ հանգամանքներ պետք է պարզվեն:
Այնուամենայնիվ մենք կարող ենք մի քանի հանգամանք փաստել. չնայած նրան, որ իշխանությունը արգելափակել էր քաղաքական պայքարի հնարավորությունը, մեր բնակչությունը զանգվածային և կազմակերպված ձևով «Սասնա ծռեր»- ի ապստամբության կոչին չարձագանքեց, ինչպես նաև ընդդիմության մեջ այդ օրերին տարակարծություններ, «հարթակակռիվներ» եղան: Հասարակությունը դեմ է իշխանությանը, համակրում է «Սասնա ծռեր»- ին և ընդունում է նրանց վերջնական նպատակները, սակայն պայքարի ձևը չի ընդունում. մեր հասարակությունը պատրաստ չէ զինված ապստամբության»:
Հ. Բալանյանի կարծիքով՝ «Սասնա ծռեր»- ի գործողությունը ցույց տվեց ոչ թե ընդդիմության տապալումը, այլ սխալները. «Տապալվել է այն քաղաքական գիծը, որը վարել են տարիներ շարունակ. առանց ներքին երկխոսության, առանց տեքստի, առանց ծրագրի, որոնք պետք է հանրությանը ներկայացվեն»: Հայկ Բալայանի խոսքով՝ «Սասնա ծռերի» գործողությունների ընթացքում և հետո Հայաստանի իշխանությունը և վերնախավը միավորվեց պետության շուրջ, իսկ ընդդիմությունը էլ ավելի պառակտվեց: Նրա կարծիքով՝ այս իրավիճակում մեծ, ամբիցիոզ ծրագրերից մարդիկ հիասթափվում են, որովհետև ռեալ ռեսուրսներ չեն տեսնում: Ռոմանտիկ և ազնիվ մղումներով առաջնորդվելը, ըստ փորձագետի, շատ հաճախ հակառակ արդյունքին է բերում, և դրանից կարող են օգտվել այլ ուժեր:
ՏԻՄ ընտրությունների վերաբերյալ Հայկ Բալանյանը նշեց, որ վերադասավորումներ կլինեն. «Եթե ընդդիմությունը առանձին-առանձին մասնակցի ընտրություններին, հետագայում ձևավորվելու է մի խորհրդարան, որը ձեռնտու կլինի իշխանությանը: Առանձին ոչ մի ընդիմադիր ուժ ունակ չէ միայննակ մարտահրավեր նետել իշխանությանը: Ընդդիմությունը պետք է միավորվի ոչ թե ընդդեմ իշխանության, այլ հանուն ինչ-որ գաղափարի և հստակեցնել, թե ով ինչի է պատրաստ»:
Մանրամասները՝ տեսանյութում:
