Այսօր Կոտայքի մարզի Պռոշյան գյուղում անցկացվեցին համայնքի ղեկավարի արտահերթ ընտրություններ: Պռոշյանի գյուղապետի պաշտոնի համար պայքարում էին երեք ինքնառաջադրված թեկնածուներ՝ Պռոշյան համայնքի ղեկավարի տեղակալ, ՀՅԴ անդամ Վովա Սահակյանը, ՀՀԿ անդամ Արթուր Մուրադյանը և անկուսակցական, «ՀՀ նախագծերի պետական արտագերատեսչական փորձաքննություն» ՓԲԸ-ի գլխավոր մասնագետ Ալեքսան Ալեքսանյանը:
Գյուղացիներն այսօր ընտրում էին երկու` թիվ 26 ընտրատարածքի 26/01 և 26/02 ընտրատեղամասերում, որտեղ ընտրողների թիվը շուրջ երեք հազար էր: Պռոշյան գյուղում ընտրությունների վերջին ժամերին «Առաջին լրատվական»-ը զրուցեց ընտրատեղամասերի նախագահների հետ, որոնք ասացին, որ արտակարգ միջադեպեր օրվա ընթացքում չեն գրանցվել, ավելին՝ եթե գյուղում լարվածություն նույնիսկ եղել է, այն ընտրատեղամասերին չի փոխանցվել:
«Առաջին լրատվական»-ը զրուցեց նաև մի քանի պռոշյանցիների հետ, որոնք ասացին, որ նախկին գյուղապետ Հրաչ Մուրադյանի սպանությունից հետո գյուղում լարվածություն չեն զգացել, և գյուղը շարունակել է իր բնականոն կյանքը, թեև վերջին ամիսներին լրատվամիջոցները գրում էին գյուղում լարվածության մասին: Գյուղացիներից մեկը մեզ հետ զրույցում ասաց, որ շատ բան կարող են խոսել, ինչը կարող է չհամապատասխանել իրականությանը:
Առաջարկում ենք մանրամասներին ծանոթանալ տեսանյութի միջոցով:
