Միասեռ ամուսնություններին դեմ հանդես եկողների մի խումբ սուլել և դժգոհ ձայներով ճանապարհել է Ֆրանսիայի նախագահ Ֆրանսուա Օլանդին, ով այսօր Ելիսեյան դաշտերում բացել է գլխավոր ազգային տոնին՝ Բաստիլի գրավմանը նվիրված ռազմական շքերթը:
Դեպքը տեղի է ունեցել այն պահին, երբ երկրի ղեկավարը, որպես զինված ուժերի գլխավոր հրամանատար, բաց ավտոմեքենայով շքերթի սկզբում անցել է քաղաքի գլխավոր պողոտայով: Նրան ուղեկցել են հանրապետական գվարդիայի սպաները:
«Մանիֆեստ բոլորի համար» շարժումը, որը միավորում է Ֆրանսիայում մասեռ ամուսնությունների հակառակորդներին, տոնի նախօրեին պաշտոնապես հայտարարել էր, որ երկրի գլխավոր տոնին հրաժարվում է ցանկացած ձևի բողոքի ակցիաներից: Այդ որոշումը, նրանց խոսքերով, ընդունվել է «ֆրանսիական բանակի նկատմամբ հարգանքից ելնելով»: Այսպիսով, մնացած ակտիվիստները, ովքեր մտադիր են շարունակել հրապարակային ելույթները, իրենց գործողությունները համապատասխանեցրել են սոցիալական ցանցերի միջոցով:
Ելիսեյան դաշտերում տեղի ունեցածից բացի, ֆրանսիական մայրաքաղաքում ավելի մանր դեպքեր էլ են տեղի ունեցել. երբ պահպանողական տրամադրված քաղաքացիները փորձել են համապատասխան կարգախոսներով դրոշներ և պաստառներ բացել:
Այս տարվա մայիսի կեսերին Ֆրանսիան աշխարհում 14-րդ պետությունն է դարձել, որտեղ օրինականացվել են միասեռ ամուսնությունները: Օրինագծի շուրջ խորհրդարանական քննարկումներն ուղեկցվել են զանգվածային բողոքի ակցիաներով: Փարիզում տեղի ունեցած խոշորագույն ակցիային օրինագծի գրեթե մեկ միլիոն հակառակորդներ են մասնակցել: Առաջին միասեռ ամուսնական միությունը Ֆրանսիայում գրանցվել է մայիսի 29-ին:
