Թուրքական Daily Sabah թերթի փոխանցմամբ՝ Թուրքիայի էկոնոմիկայի նախարար Նիհաթ Զեյբեքչին հայտարարել է, որ Թուրքիան ցանկանում է միանալ Եվրասիական տնտեսական միությանը: «Մինչև 2015 թվականի նոյեմբերի 24-ը ռուսական ինքնաթիռի ոչնչացումը մենք բանակցություններ ենք վարել Ռուսաստանի հետ: Ռուսաստանի նախագահ Վլադիմիր Պուտինի՝ Թուրքիա կատարած վերջին այցի ժամանակ մենք Ռուսաստանի էկոնոմիկայի նախարարի հետ ստորագրել ենք ազատ առևտրի գոտու ստեղծման մասին շրջանակային համաձայնագիր:
Այժմ մենք վերսկսել ենք բանակցությունները և ցանկանում ենք դրանք ավարտել հնարավորինս արագ: Ազատ առևտրի գոտին ներառելու է ծառայությունների ու ներդրումների ոլորտը: Հետագայում կողմերը պլանավորել են այնտեղ ներառել արդյունաբերական արտադրությունը և, մասնավորապես, գյուղատնտեսական ոլորտը: Ռուսաստանը գլխավորում է ԵԱՏՄ-ն, որի մեջ ընդգրկված են այնպիսի երկրներ, ինչպիսիք են Հայաստանը, Բելառուսը, Ղազախստանը, Ղրղըզստանը և Ադրբեջանը (թուրք նախարարը Ադրբեջանը նույնպես դասել է ԵԱՏՄ անդամների թվին, թեպետ դա այդպես չէ): Բնականաբար, մենք ցանկանում ենք միանալ ԵԱՏՄ-ին, սակայն առանց վնասելու ԵՄ-ին լիիրավ անդամակցելու գործընթացը և խախտելու Մաքսային միությունը»,- նշել է Թուրքիայի էկոնոմիկայի նախարարը:
Անդրադառնալով այս հայտարարությանը՝ «Առաջին լրատվական»- ի հետ զրույցում քաղաքագետ Ռուբեն Մեհրաբյանը նշեց. «Շատ կարևոր հայտարարություն է, բայց դրա նշանակությունը պետք չէ գերագնահատել. Թուրքիան իր ներկայիս տնտեսական զարգացման շեմին հասել է շնորհիվ ԵՄ հետ այն տնտեսական ռեժիմի, որը կա, երկրորդ՝ տեխնոլոգիաների ոլորտում ԵՄ երկրների, մասնավորապես Գերմանիայի հետ համագործակցության: Այսօր Թուրքիան զարգացման ասյ շրջափուլում ունի անհաղթահարելի հակասություններ ԵՄ-ի և ԱՄՆ-ի հետ, և կարող է գնալ նմանատիպ կոնյուկտուրային, թեկուզև շատ հեռուն գնացող հայտարարությունների, բայց ես չեմ կարծում որ գործնական դաշտում դրանք կմարմնավորվեն»:
Ռ. Մեհրաբյանի խոսքով՝ իրականում սա Արևմուտքին շանտաժի ենթարկելու համար է արվում, բացի դրանից՝ փորձելով այդ քաղաքական առևտրում սեփական տեսակետը փաթաթել ԵՄ-ի և ԱՄՆ-ի վրա:
Թուրքիայի ԵՏՄ-ին անդամակցելու հավանականության վերաբերյալ քաղաքագետը նշեց, որ ռուս-թուրքական տնտեսական հարաբերություններում իմաստ չկա անդամակցելու. ի՞նչ է ուզում անել Թուրքիան, որ չի կարողանում անել առանց ԵՏՄ մտնելու:
Ռ.Մեհրաբյանի խոսքով՝ այսպիսի հայտարարությունները սնուցում են և՛ Թուրքիայի, և՛ Ռուսաստանի իշխանություններին հաճո հասարակական տրամադրությունները:
Անդրադառնալով դիտարկմանը, որ Թուրքիայի էկոնոմիկայի նախարարի հայտարարությունից հետո Երևանը պետք է հայտարարություն անի, որ որևէ կերպ չի դիտարկում Թուրքիայի ԵՏՄ կազմում լինելը, ավելին՝ Երևանը դրանից հետո պետք է կոնկրետ գործողությունների անցնի, Ռ. Մեհրաբյանը նշեց, որ Հայաստանը պետք է այս աբսուրդ իրավիճակից դուրս գա, հաղթահարի թվացյալ վախերը, հրաժարվի ուղղություններից, որոնք տրամագծորեն հակառակ են մեր շահերին:
Նրա խոսքով՝ Ռուսաստանը օձի պես կախվել է և չի թողնում Հայաստանը օգտվի իր աղբյուրներից:
Մանրամասները՝ տեսանյութում:
