Փախստականների հարցերով ՄԱԿ-ի Գերագույն հանձնակատարի վարչությունն Իրաքում սպասում է հարկադիր տեղահանվածների թվի կտրուկ աճ՝ Մոսուլ քաղաքի շրջակայքում մարտերի ուժեղացման պատճառով։ Այս մասին Ժնևում ճեպազրույցի ժամանակ հայտարարել է այդ գերատեսչության պաշտոնական ներկայացուցիչ Էդրիան Էդվարդսը։
«Մոսուլը Իրաքի մեծությամբ երկրորդ քաղաքն է, և ռազմական գործողության մարդասիրական հետևանքները, ինչպես սպասվում է, վիթխարի կլինեն։ Այն կարող է անդրադառնալ մինչև 1.2 մլն մարդու վրա»,-նշել է նա։
Էդվարդսի խոսքով՝ մարդկանց տեղաշարժի մասշտաբները կարող են կտրուկ աճել։ Վերջին ամիսներին երկրի տարբեր շրջաններում իրենց տներն են արդեն լքել 213 հազար անձիք, այդ թվում 48 հազարը՝ Մոսուլի շրջանում, 87 հազարը՝ Էլ-Ֆալուջայում։ 2014 թվականի հունվարից երկրում ներքին տեղահանված անձ է դարձել 3.38 մլն մարդ։
Ներքին տեղահանվածներին ապաստանելու համար Իրաքի հյուսիսում նախատեսվում է կառուցել 6 ճամբար։
