«Կանխե՛նք գազի գնի թանկացումը» նախաձեռնության անդամ Սիլվա Ադամյանը հիասթափված է գազի գնի թանկացման հանդեպ քաղաքացիների անտարբերությունից: «Առաջին լրատվական»-ի հետ զրույցում, պատասխանելով այն հարցին, թե հնարավո՞ր է տրանսպորտի ուղեվարձի թանկացման հետ կապված բունտ հասունանա, նա կարծիք հայտնեց, որ յուրաքանչյուր ոք, ով դժգոհում է գազի գնի թանկացումից՝ դա անում է միայն տանը այդ մասին խոսելով. «Մի՞թե դժվար էր չստորագրել այդ պայմանագրերի տակ, մենք հո չէինք առաջարկում բոմբ առնել ու պայթեցնել, մենք ընդամենը կոչ էինք անում պաշտպանել իրենց իրավունքները։ Ես կասկածում եմ, որ տրանսպորտի գնի բարձրացման հետ կապված որևէ քայլ կձեռնարկեն»,- ասաց նա:
Ինչ վերաբերում է իրենց նախաձեռնության հետագա գործունեությանը, տիկին Ադամյանը նշեց, որ իրենք պատրաստվում են հանրային մշտադիտարկման խումբ ստեղծել և փորձել «ներսից» հասկանալ, թե ինչ է կատարվում. «Իմ կարծիքով նույնիսկ «Հայռուսգազարդին» է «Գազպրոմը» խաբել, և Ռոբերտ Նազարյանը փաստաթղթի էությունը չի հասկացել ստորագրելիս: Այնտեղ նշվում է, որ 18 միլիոն դրամ մեկ տարվա կտրվածքով պետք է աշխատողների աշխատավարձերին տրամադրվի, և մոտ 1000 նոր աշխատող պետք է «Հայռուսգազարդն» ընդունի, այնինչ ես լավ տեղյակ եմ՝ ո՛չ ինչ-որ մեկի աշխատավարձն է բարձրացել, ո՛չ էլ ինչ-որ նոր աշխատող են ընդունել: Ըստ էության, ստորագրվել է մի փաստաթուղթ, որը չի համապատասխանում իրականությանը: Ես ինչ-որ տեղ համաձայն եմ, որ աշխատավարձերը բարձրացվի, որովհետև այնտեղի աշխատողները տաժանակիր աշխատանք են անում, շատ լավ պատկերացնում եմ, բայց ո՞ւր է, նման բան չկա»:
Մեր զրուցակիցը նշեց նաև, որ հիմա բողոքի ակցիաներ անցկացնելու իմաստ չի տեսնում, քանզի խնդիրն անհրաժեշտ է ուսումնասիրել ներսից և բարձրաձայնել այդ մասին. «Չգիտեմ ինչքանով մեզ կհաջողվի այդ մշտադիտարկումն իրականացնել, այնուամենայնիվ՝ կփորձենք»:
Լուսանկարը՝ Photolure-ի
