Ութուկես տարվա ընդմիջումից հետո ԱՄՆ-ից հայրենիք է վերադարձել դերասանուհի Նարե Հայկազյանը: Դերասանուհու խոսքով՝ այդ տարիների ընթացքում ինքն այնքան խտացումներ է ապրել, հատ-հատ հաշվել է օրերը, ունեցել դժվարին պահեր:
«ԱՄՆ-ը իմ մանկության երազանքը չի եղել: Կորուստներ էի ունեցել, մեկ ճամպրուկով ճամփորդում էի, երբ հրավեր ստացա՝ ԱՄՆ-ում անել իմպրովիզացիա: Չկարողացա վերադառնալ ճիշտ ժամանակին»,- լրագրողների հետ հանդիպմանը խոստովանեց երգչուհին:
Նրա խոսքով՝ դժվար էր ամեն ինչ զրոյից սկսելը, սակայն «ինչքերի հետևից չընկա»: «Հայտնվեցի մի վայրում, որտեղ կենսականորեն ամեն վայրկյան կարող էի մահանալ, բայց պետք է կարողանայի ապրել: Մեր հայրենիքը մեզ պահում է տաք արյան մեջ, բայց օդի պակաս կա»,- անկեղծացավ Նարե Հայկազյանը:
ԱՄՆ-ում գոյատևելու համար դերասանուհին, ով իր իսկ խոսքով՝ մի կոճակ անգամ չէր կարողանում կարել, սկսեց զարմանահրաշ զգեստներ կարել ու վաճառել, որոնց թիվն անցնում էր 5 հազարից:
«Այդ էջն էլ փակվեց»,- պատմեց դերասանուհին:
Խոսելով իր գործունեության մասին՝ դերասանուհին հիշատակեց իր «Արթնացում» նախագծի մասին, նկարելու, թատերական ներկայացումների մասնակցելու, իր 6 րոպեանոց «Դուռը» ֆիլմի մասին:
Ինչ վերաբերում է Հայաստան գալուն, ապա դերասանուհին խոստովանեց, որ «եկել է այստեղ խմորվելու համար», ասաց, որ մեծ ցանկություն ունի այստեղ տեղափոխել իր նկարները, սակայն ժամանակը ցույց կտա, թե դա երբ տեղի կունենա:
«Իմ ամբողջ տենչը ազատ ելումուտ ունենալն է: Ես իմ հայրենիքում պետք է արարեմ»,- հավելեց բանախոսը:
Նա տեղեկացրեց նաև, որ Գյումրիի թատրոնն իրեն խնդրել է ներկայացում բեմադրել:
«Ես այնտեղ կյանք եմ տեսնում: Ցանկություն ունեմ իմ հայրենիքում ներկայացնել իմ ապրումները, իմ բացթողումները»,- ասաց նա:
