Aravot.am-ի փոխանցմամբ՝ Շիրակի մարզի ընդհանուր իրավասության դատարանում Գյումրու նախկին քաղաքապետ Վարդան Ղուկասյանի դստեր փեսացու` Կարեն Եսայանի սպանության գործով կայացած այսօրվա դատական նիստը անցել է աննկարագրելի լարված մթնոլորտում:
Թեև դատական գրեթե բոլոր նիստերի ժամանակ վիճաբանություններ, փոխադարձ վիրավորանքներ արձանագրվել են, սակայն այս մեկը տարբերվել է իր բնույթով. Հնչել են անգամ հայհոյանքներ, որին մասնակցություն է ունեցել ամբաստանայլը: Բանն այն է, որ այսօր վկայություն է տվել ամբաստանյալի մայրը` Անահիտ Նիկոլյանը, ով կոտրած ոտքով է եկել դատարան:
Տիկինը, այսպես ասած, հակավարդանական ելույթ է ունեցել` նշելով, որ, ըստ իրեն հասած տեղեկությունների, Կարեն Եսայանին սպանել է Ղուկասյանի որդին` Սպարտակը, քանի որ վերջինս դեմ է եղել, որ իր քույրը` Մանյան, ամուսնանա Կարենի հետ: Այս խոսքերը բնականաբար դուր չի եկել դատարանի դահլիճում նստած Կարեն Եսայանի ընկերներին, ովքեր տեղից ինչ-որ ռեպլիկներ են հնչեցրել վկայի հասցեին:
Անահիտ Նիկոյանը ևս սկսել է կռվել այդ երիտասարդների հետ` նրանցից մեկին անվանելով «երջանիկ ապուշ» ու պնդելով, որ նրանք շուրթերի շարժումներով իրեն հայհոյել են: Սա լսելով`ամբաստանյալ Հարություն Սարգսյանը բորբոքվել է, ինքը իր հերթին սկսել է հայհոյել այդ տղաներին:
Դատավոր Մարտին Սարոյանը անկարողությունից անմիջապես ընդհատել է դատը:
Անահիտ Նիկոլյանը նաև պատմել է, որ դեպքի օրը, երբ իրենց հրավիրել են ոստիկանություն, ինքը լսել է, որ 3-րդ հարկից մի տղամարդ բարձր ձայնով գոռում է. «Սարգսյանի որդուն` Հարությունին բաց թողեք, ես կգամ կասեմ, ում բերեք»: Ըստ վկայի, այս խոսքերից հետո կարճ ժամանակ անց լսել է, որ քննիչին մեքենայի տակ գցեցին ու սպանեցին: Խոսքը Շիրակի մարզի քննչական բաժնի հատկապես կարևորագույն գործերով ավագ քննիչ Վահրամ Բեյբությանի մասին է, ով հենց դեպքի օրը իր ավտոմեքենան կանգնեցնելով հանդիպակաց մայթին` փորձել էր անցնել փողոցը, որպեսզի մտնի ոստիկանության շենք, սակայն գիշերով հարբած մի երիտասարդ` Ռաֆիկ Մուրադյանը, բարձր արագության տակ նրան մեքենայի տակ էր գցել ու դիմել փախուստի: Քննիչը մահացել էր շտապօգնության մեքենայի մեջ: Անահիտ Նիկոլյանը մի քանի անգամ կրկնել է, որ քննիչին սպանել են, ինքը իր ականջներով լսածն է կրկնում:
Նյութն ամբողջությամբ կարդացեք aravot.am-ում:
