Տարածաշրջանում տեղ ունեցող զարգացումների վերաբերյալ Հայաստանն իր զգուշությունը պետք է ցուցաբերի: Այսօր լրագրողների հետ հանդիպման ժամանակ այս մասին ասաց ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը` խոսելով տարածաշրջանային գործընթացների և հնարավոր զարգացումների շուրջ:
Նա նշեց, որ տարածաշրջանի մասին խոսելով՝ չի կարելի չխոսել Եգիպտոսում տեղի ունեցող զարգացումներից և այն փաստի մասին, որ հատկապես Արևմուտքը, տարածաշրջանում ազդեցիկ ուժերը չեն ցանկանում, որպեսզի Եգիպտոսում տեղի ունեցածը տեղափոխվի այլ երկրներ, այդ պատճառով փորձում են սահմանափակել այդ իրադարձությունները: Ըստ նրա՝ միայն Թուրքիան է, որ փորձում է Եգիպտոսում տեղի ունեցածը բերել նախկին վիճակին, թեև շատերը չեն հավատում, որ դա հաջողվելու է Թուրքիային: Ինչ վերաբերում է Սիրիային, ապա, բանախոսի համոզմամբ, Սիրիայում իրադարձությունները բացասական ծանր հետևանքներով լեցուն են, ռազմական որոշ գործողություններ գործող իշխանությունը հաջողել է, թեև ընդհանուր առմամբ վերջը, ելքը չի երևում:
«Դարձյալ Թուրքիան, մեկ-երկու այլ պետություններ փորձում են ստեղծել այնպիսի իրավիճակ, որը ևս միջազգային համայնքի և մնացյալ պետությունների ցանկությամբ չէ: Այստեղ ևս ճիգ կա սահմանափակել իրադարձությունները, որն առայժմ չի հաջողվում: Տեսնում ենք, որ Լիբանանում Սիրիայի իրադաձություններն իրենց վատ ազդեցությունն են ունենում: Եգիպտոսում և Սիրիայում տեղի ունեցող իրադարձությունները տեղի հայ համայնքի վրա կանդրադառնան, ուստի Հայաստանը պետք է ունենա այնպիսի կեցվածք, որ այս կամ այն քաղաքական կողմի հետ չնույնացվի և ցանկացած երկրում կարողանա իր շահերը հետապնդել ձևավորվելիք նոր ուժերի հետ»,- նման կարծիք հայտնեց Կիրո Մանոյանը:
Անդրադառնալով «Եվրասիական միություն, թե ԵՄ» երկընտրանքի շուրջ ծավալող խոսակցություններին՝ նա ասաց, որ ասվում է, թե Եվրասիական միության կողմից Հայաստանի առջև անդամակցության կտրուկ պահանջ չի դրվել, կան գործընթացներ, բանակցություններ այդ ուղղությամբ: Ըստ նրա՝ շատ կարևոր հարցեր կան ՀՀ-ի անվտանգության, ԼՂ-ի հետ կապված, որոնք մինչ այդ միությանն անդամակցելը պետք է հստակեցվեն: Մենք երաշխավորություն պետք ստանանք, որ Եվրասիական մությանը միանալու պահանջ դրվի, շատ հարցեր իրենց լուծումը պետք է ստանան, պետք է ավելի պահանջկոտ լինենք»,- ասաց նա՝ հավելելով, որ իր դիտարկումների համաձայն՝ Հայաստանը փորձում է համաչափ քաղաքականության սկզբունքով առաջ շարժվել:
