2012 թվականից քաղաքացիները կարող են երևանյան ռեստորանների, խանութների, սրճարանների ու բարերի մասին արտահայտել իրենց կարծիքը՝ yevista.am կայքում: Ինչպես «Առաջին լրատվական»-ին փոխանցեց «Արմակադի»` Ակադեմիական համագործակցության և օժանդակության հայկական ասոցիացիայի նախագահ, «Եվիստա» (www.yevista.am) կազմակերպության գործադիր տնօրեն Խաչիկ Գևորգյանը, կայքն արդեն ունի մոտ 8 հազար այցելու. «Կայքի շնորհիվ ռեստորանների, խանութների հաճախորդները կարողանում են իրենց առաջարկությունների, դժգոհությունների մասին արտահայտվել: Մենք էլ մեր հերթին այդ կարծիքները փոխանցում ենք տվյալ կազմակերպություններին»:
Խ. Գևորգյանն ասաց, որ հաճախորդի դժգոհությունները լսելիս կան ռեստորաններ, որոնք շտկում են սխալները, և կան այնպիսիները, որոնք հիվանդագին են մոտենում հարցին. «Բացի այն, որ մի քանի ռեստորանատերեր ցավով են ընդունում, անգամ վիրավորում են հաճախորդին՝ չմտածելով, որ այդ պահվածքով վանում են նրանց»:
Նրա կարծիքով՝ քաղաքացիական հասարակությունը սկսվում է «Եվիստա»-ից, որովհետև հաճախորդներն իրենց կարծիքներով ազդում են իրենց մատուցվող ծառայությունների որակի վրա: Հաճախ լինում է նաև այնպես, որ հաճախորդները վախենում են կարծիք գրել անմիջական սպասարկման ռեստորանի կամ վարսավիրանոցի հասցեին՝ մտածելով, որ դա կարող է վտանգավոր լինել իրենց համար:
Մեր զրուցակիցը փոխանցեց նաև, որ «Եվիստա»-ն քայլ առ քայլ զարգանում է, սկզբում միայն ռեստորաններն էին ներառված կայքում, որից հետո ավելացան բանկերը, խանութները, իսկ վերջերս՝ տաքսի ծառայությունները. «Որոշ ժամանակ անց կավելանան այլ գերատեսչություններ՝ դպրոցներ, դեսպանատներ, նախարարություններ: Վերջերս խնդրանք է եղել, որ շատ արագ ավելացնենք դեսպանատները, որովհետև քաղաքացիները մի շարք բողոքներ ունեն»:
