Երևանում ՊՊԾ գնդի գրավման հետ կապված ճգնաժամը բարձրացրել է ապստամբության վտանգավոր ալիք Հայաստանի իշխանությունների համար. երկրի քաղաքացիները մտավախություն ունեն, որ նախագահ Սարգսյանը Ղարաբաղում ապրիլյան իրադարձություններից հետո նախաձեռնված բանակցությունների արդյունքում ԼՂ հարցում կգնա տարածքային և քաղաքական զիջումների: Այս մասին ասվում է ամերիկյան Stratfor վերլուծական ընկերության հոդվածում:
«ԼՂ հարցով փոխզիջման հնարավորությունը կարող է դառնալ Հայաստանի իշխանությունների տապալման պատճառ»,- նշում են Stratfor-ի վերլուծաբանները՝ հիշեցնելով 1998թ. ԼՂ հարցով զիջումների գնալու պատրաստակամության պատճառով ՀՀ առաջին նախագահ Լևոն Տեր-Պետրոսյանի հրաժարականի մասին:
Stratfor-ը գրում է, որ Սերժ Սարգսյանը երկու քարի արանքում է: «Մի կողմից՝ Ռուսաստանը և Արևմուտքը ճնշում են գործադրում հակամարտության քաղաքական կարգավորման հարցում, մյուս կողմից՝ լուրջ զիջումները կարող են կործանարար լինել հենց նախագահի և նրա կառավարության համար»,- նշում է Stratfor-ը:
ԼՂ հարցը, քաղաքացիների նկատմամբ ձեռնարկված կոշտ միջոցների հետ միասին, ինչպես նաև իշխանության կենտրոնացումն ու Սարգսյանի ռեժիմի հետ կապված կոռուպցիան գնալով ավելի են թուլացրել երկրի իշխանությունների դիրքերը՝ նշվում է Stratfor-ի հոդվածում:
