Ով մի փոքր ամբիցիա ցուցաբերեց իշխանության ներսում ամրապնդվելու, ժառանգորդ լինելու ուղղությամբ, ուժեղ հարված է ուտելու: Այսօր լրագրողների հետ հանդիպման ժամանակ այս մասին ասաց քաղտեխնոլոգ Կարեն Քոչարյանը՝ խոսելով ներքաղաքական զարգացումների շուրջ:
Նա նշեց, որ այսօր քաղաքական դաշտում տեղի ունեցող գործընթացները պետք է դիտարկել ավելի լայն զարգացումների համատեքստում: Կարեն Քոչարյանն ասաց, որ ընդդիմության բավականին թուլացած պայմաններում չկա իշխանության կոնսոլիդացիայի խնդիր, ուստի իշխանական տարբեր թևերը փորձում են ամրապնդել իրենց դիրքերը` հետագայում Սերժ Սարգսյանի ժառանգորդը դառնալու նպատակով: Սակայն, քաղտեխնոլոգի համոզմամբ, ով մի փոքր գլուխը հանեց իր բնից, մի փոքր ամբիցիա ցուցաբերեց ամրապնդվելու, ժառանգորդ լինելու շատ ուժեղ հարվածներ է ստանալու, ինչին ականատես դարձանք ՀՀ նախագահի հրավիրած խորհրդակցության ժամանակ, որի ընթացքում Հովիկ Աբրահամյանը ստացավ այդ հարվածը:
«Սերժ Սարգսյանի դերը հետևյալն է՝ նա ավելի է ցցում այն դիրքը, որն ունի՝ խաղալ հակասությունների վրա, լինել վեր արբիտրի դերում, իշխանության մեջ հակակշիռների սկզբունքներով խաղալ»,- նկատեց քաղտեխնոլոգը: Հարցին, թե ով կարող է լինել Սերժ Սարգսյանի ժառանգորդը, նա պատասխանեց, որ դժվարանում է ասել, երբ տեսնում է ինչ է կատարվում:
Անդրադառնալով ընդդիմությանը՝ բանախոսն ասաց, որ կարծում է, թե այս պահին ընդդիմություն չունենք: «Կան անհատներ, ինչպես Նիկոլ Փաշինյանը, ում վերջին ելույթը ԱԺ-ում դասական պառլամենտական ելույթ էր: Կան անհատներ, սակայն այսօր անգամ կուսակցությունը, եթե չունի լուրջ ռեսուրսներ, դժվարանում է գործել: Անհատները ցվրված են, ընդդիմությունն իր այլընտրանքներով, աղոթքներով, քաղաքագիտական վերլուծություններով փուչիկ է հիշեցնում: Այս զարգացումները կտանեն աշուն, և որոշակի փոփոխություններ կլինեն, բայց կարծում եմ, որ դրանք համակարգային չեն լինի»,- մեկնաբանեց Կարեն Քոչարյանը:
Լուսանկարը՝ PanARMENIAN Photo-ի
