Թուրքիայի նախագահ Ռեջեփ Թայիփ Էրդողանը երկրում երեք ամսով արտակարգ դրության ռեժիմ է սահմանել։ Նրա խոսքով՝ դա անհրաժեշտ է չեզոքացնելու համար սպառնալիքները, որոնք կապված են հուլիսի 16-ին կատարված պետական հեղաշրջման փորձի հետ։ Անկարայում կայացած մամլո ասուլիսի ժամանակ Էրդողանը հայտարարել է, որ ձերբակալությունները կշարունակվեն՝ փոխանցում է BBC-ն։
Նա խոստացել է «արագ վնասազերծել հեղաշրջման փորձի մեջ ներգրավված ահաբեկչական կազմակերպության բոլոր տարրերը»։
Իր որոշման մասին Էրդողանը հայտարարել է Թուրքիայի կառավարության նախարարների հետ հանդիպումից հետո։ Նա վստահեցրել է, որ ժողովրդավարության ինստիտուտները արտակարգ դրության ժամանակ չեն տուժի։
«Մենք երբեք զիջումների չենք գնացել, երբ խոսքը եղել է ժողովրդավարության մասին։ Եվ չենք գնա երբեք»,- ասել է նա։
Երեկ նախագահ Էրդողանը 5 ժամ տևողությամբ Ազգային անվտանգության խորհրդի նիստ է գումարել, որի ժամանակ քննարկվել են անվտանգության նոր միջոցառումները։
Իշխանության տապալման փորձի մեղադրանք է առաջադրվել 99 գեներալի։ Դա մոտավորապես 356 բարձրագույն սպաների ընդհանուր թվի մոտ 1/3-ն է։
Իշխանությունները նաև արգելել են բոլոր գիտնականներին ու համալսարանական դասախոսներին՝ չհեռանալ երկրից, քանի դեռ շարունակվում են պետական ծառայողների զտումները։
Ներկայումս արդեն ավելի քան 50 հազար մարդ է ձերբակալված կամ աշխատանքից հեռացված։
Փակ է 626 հաստատություն, մեծ մասամբ մասնավոր դպրոցներ և քոլեջներ։ Կասկածներ կան, որ դրանք կապված են Ֆեթուլլահ Գյուլենի հետ, որին Թուրքիայի իշխանությունները մեղադրել են դավադրության կազմակերպման համար։
