«Հայ-ամերիկյան» առողջական կենտրոնի տնօրեն Խաչանուշ Հակոբյանի հավաստմամբ՝ քաղցկեղից խուսափելու լավագույն տարբերակը ժամանակ առ ժամանակ հետազոտություններ անցնելն է: Եթե քաղցկեղն արդեն շոշափվում է, բավականին ուշ է դա բուժելու համար. «Տարին մեկ անգամ պետք է մամոգրաֆիկ հետազոտություն անցնել, այդ դեպքում հնարավոր է քաղցկեղը հայտնաբերել դեռևս դրա վաղ շրջանում, երբ այն ոսպի հատիկի չափ է»:
Բանախոսը լրագրողների հետ հանդիպմանն ասաց, որ քաղցկեղից խուսափել հնարավոր է, եթե կերակրացանկում շատ լինի լոլիկը, սխտորը, սոխը, խաղողն ու կարմիր գինին, դրանք օրգանիզմում կատարում են «բնական քիմիաթերապիա»:
Տիկին Հակոբյանն ասաց, որ միայն այս տարի հայտնաբերվել է քաղցկեղի 376 դեպք, որոնցից 7-ը տղամարդիկ են եղել: Ամենաերիտասարդ հիվանդը եղել է 18-ամյա մի աղջիկ, ում մոտ հիվանդությունն արդեն բավականին զարգացած է եղել:
Նա նշեց, որ բժշկի չդիմելը պայմանավորված է մի քանի գործոններով, այդ թվում՝ հոգեբանական: Կանայք հաճախ մտածում են, որ գուցե գնան հետազոտության և ախտորոշեն քաղցկեղ, այդ դեպքում ինչ լինում է, թող լինի:
Նշենք, որ մամոգրաֆիկ հետազոտությունը «Հայ-ամերիկյան» առողջական կենտրոնում արժե 20 հազար դրամ, մինչդեռ նույն հետազոտությունն Ամերիկայում 1000 դոլար է:
