Զենքի խմբաքանակները, որոնք մատակարարվում են ԱՄՆ ԿՀՎ-ի և Սաուդյան Արաբիայի կողմից Հորդանան, որի տարածքում գործում է սիրիական ընդդիմադիր զինված կազմավորումների նախապատրաստման գաղտնի ծրագիր (2013-ից), պարբերաբար գողանում են հորդանանցի զինծառայողներն ու հետախուզության ներկայացուցիչները, որից հետո վերավաճառում սև շուկայում։ Այս մասին գրում է The New York Times-ը։
Սեփական հետաքննություն անցկացրած պարբերականի տվյալներով՝ միլիոնավոր դոլարների գողությունները կատարվել են ինչպես զինվորականների, այնպես էլ թագավորության հետախուզական ծառայությունների աշխատակիցների կողմից, ովքեր ներգրավված են սիրիացի ապստամբների նախապատրաստման ծրագրում։
Խոսքը, մասնավորապես, Կալաշնիկով ինքնաձիգների, ականանետների ու նռնականետների մասին է։ Հաճախ սև շուկայում հայտնված զենքը կարող է հայտնվել նաև հանցավոր խմբավորումների ձեռքում, որոնք արտերկրում զենքի անօրինական վաճառքով են զբաղվում։
Նշվում է, որ գողացված զենքը, մասնավորապես, կիրառվել է անցած տարվա նոյեմբերին Ամանում կատարված հարձակման ժամանակ, որի հետևանքով 5 մարդ է զոհվել՝ ներառյալ ԱՄՆ երկու քաղաքացի։ Ստեղծված իրավիճակը, ըստ թերթի՝ վկայում է խճճված ու չծրագրված հետևանքների առկայության մասին, որոնց հանգեցնում են ապստամբների զինման ու նախապատրաստման ծրագրերը։
