Բացի Մեծ Բրիտանիայից՝ ԵՄ-ից լուրջ պահանջներ ունեն 6 երկրներ, որոնք նույնպես հավակնում են միությունից դուրս գալու: Այս մասին գրում է Washington Post-ը՝ հղում անելով փորձագետներին:
Ըստ նրանց՝ Բրիտանիայից հետո ԵՄ-ից շուտով դուրս կգան Նիդերլանդները, Ֆրանսիան, Հունաստանը, Շվեդիան, Հունգարիան և Դանիան:
Իր հերթին, Իտալիայի ԱԳՆ նախկին ղեկավար Ֆրանկո Ֆրատինին կարծում է, որ ԵՄ կազմից Միացյալ Թագավորության դուրս գալը սկիզբ կդնի դրա հետագա քանդվելուն, քանի որ շատ երկրներում արդեն մտածում են՝ արդյո՞ք ժամանակակից Եվրոպան խնդիրների լուծում է:
Միաժամանակ, Շվեդիան արդեն վաղուց ԵՄ-ից որոշակի հեռավորություն էր պահում, հրաժարվել է եվրոյից և դեմ է հանդես եկել եվրոպական քաղաքականության շատ ասպեկտներին:
Հունաստանը նույնպես վերջին տարիներին մի քանի անգամ հայտարարել է ԵՄ-ն լքելու իր մտադրության մասին երկրում ֆինանսական ճգնաժամի ֆոնին:
Դանիան ԵՄ-ի հետ տարակարծիք է փախստականների հետ կապված քաղաքականության հարցում:
Նիդերլանդներում նույնպես եվրոսկեպտիկները դեմ են Բրյուսելի միգրացիոն քաղաքականությանը և կկարողանան Բրիտանիայի նման հանրաքվե կազմակերպել: Ֆրանսիացի քաղաքական գործիչները նույնպես մտադիր են իրենց երկրում հանրաքվե նախաձեռնել, որպեսզի Ֆրանսիան դուրս բերեն ԵՄ կազմից և երկրին վերադարձնեն «ազատությունը»:
