2015թ. ՀԱՅԷԿՈՆՈՄԲԱՆԿԻ համար նշանավորվեց կարևոր ձեռքբերումներով, որակական դրական տեղաշարժերով և միջազգային ֆինանսական կառույցների հետ համագործակցության խորացմամբ ու ընդլայնմամբ: Ամրապնդվեց համագործակցությունը Բանկի ավանդական գործընկերների` Վերակառուցման և Զարգացման Եվրոպական Բանկի, Գերմանահայկական Հիմնադրամի, Միջազգային Ֆինանսական Կորպորացիայի, Սևծովյան Առևտրի և Զարգացման Բանկի, Ասիական Զարգացման Բանկի և ԲլուՕրչարդ Գլոբալ Միկրոֆինանսավորման Հիմնադրամի հետ:
Շուկայում բանկի ունեցած դիրքի կայունության, հաճախորդների համար վստահելի գործընկերոջ համբավի գերակայության և բանկի նկատմամբ հաճախորդների վստահության շարունակական աճի մասին է վկայում հաշվետու տարվա ընթացքում ինչպես ֆիզիկական անձանց ժամկետային ավանդների, այնպես էլ բանկի ակտիվ գործող հաճախորդների թվաքանակի աճը, որի արդյունքում բանկի հաճախորդների թիվը կազմել է ավելի քան 133.6 հազ. հաճախորդ: 2015թ-ին Բանկն ապահովել է հիմնական ցուցանիշների զգալի աճ 2014թ-ի ցուցանիշների նկատմամբ, մասնավորապես` Բանկի ընդհանուր ակտիվներն աճել են 17.9%-ով, հաճախորդներին տրված վարկերը` 13.7%-ով, հաճախորդների նկատմամբ պարտավորությունները` 7.7%-ով, իսկ ընդհանուր կապիտալը` 35.5%-ով:
ՀԱՅԷԿՈՆՈՄԲԱՆԿԻ Խորհրդի նախագահ Սարիբեկ Սուքիասյանը իր ելույթում նշեց, որ արդեն սկսվել է բաժնետոմսերի 13-րդ տեղաբաշխումը, որը կավարտվի սեպտեմբերի վերջին: Այս տեղաբաշխումը և ԲՏԱ Բանկի միացումը թույլ կտա կատարել 2017թ.-ի հունվարից ուժի մեջ մտնող ՀՀ Կենտրոնական բանկի նորմատիվային կապիտալի 30 մլրդ ՀՀ դրամի պահանջը:
Տեղաբաշխվող բաժնետոմսերի ընդհանուր ծավալը մոտ 5 մլրդ ՀՀ դրամ է, մեկ բաժնետոմսի արժեքը 14,600 ՀՀ դրամ:
Ս. Սուքիասյանը նաև նշեց, որ բաժնետոմսերի նախորդ տեղաբաշխումը ցույց տվեց, որ առկա է ՀԱՅԷԿՈՆՈՄԲԱՆԿԻ նկատմամբ վստահության աճ, քանզի նշյալ տեղաբաշխման արդյունքում բաժնետերերի քանակն ավելացավ մոտ 1600- ով: Ներկայումս Բանկն արդեն ունի 3000-ից ավելի բաժնետեր:
«Բաժնետերերի քանակի ավելացման պատճառներից է նաև շահաբաժինների վճարման Բանկի քաղաքականությունը: Այսօրվա բաժնետերերի ժողովը որոշում է կայացրել 14% շահաբաժիններ վճարելու վերաբերյալ, ինչը վկայում է այն մասին, որ ՀԱՅԷԿՈՆՈՄԲԱՆԿՈՒՄ կատարված ներդրումը հանդիսանում է կայուն եկամուտների երաշխիք»,- իր խոսքն ավարտեց Բանկի Խորհրդի նախագահը:
Հաշվետու տարում ներդրված նոր ծառայություններից առանձնանում են փոքր և միջին բիզնեսի զարգացմանն ուղղված ծրագրերը, հատկապես` տեղական կոշիկի արտադրությունը խթանող վարկերի տրամադրումը, ինչպես նաև հատուկ մանկավարժների համար նախատեսված արտոնյալ պայմաններով փաթեթի ներդրումը:
2015թ-ին Ասիական Զարգացման Բանկը` Առևտրի ֆինանսավորման ծրագրի շրջանակներում, ՀԱՅԷԿՈՆՈՄԲԱՆԿԻՆ շնորհեց «Հայաստանում առաջատար գործընկեր բանկ» մրցանակը: MoneyGram վճարահաշվարկային համակարգի կողմից ՀԱՅԷԿՈՆՈՄԲԱՆԿԸ ստացավ «Պրոֆեսիոնալիզմի և Հայաստանում փոխանցման ծառայությունների զարգացմանը նպաստելու համար» հավաստագիրը:
