Ռուսական RIA Novosti լրատվական գործակալության փոխանցմամբ` Թուրքիայի արտգործնախարար Մևլյութ Չավուշօղլուն հայտարարել է, որ Թուրքիան իր ինքնաթիռներով չի օգնի Կիպրոսում (իր խոսքերով` Հարավային Կիպրոսում) մոլեգնող անտառային հրդեհների մարմանը:
Ավելի վաղ հաղորդվել էր, որ Կիպրոսը անտառային հրդեհների մարման հարցում օգնելու խնդրանքով դիմել է Թուրքիային: Դրա հետ կապված` Չավուշօղլուն հայտարարել է, որ Կիպրոսը «քաղաքական խաղեր է խաղում» հումանիտար հարցերի հիման վրա:
Չավուշօղլուի խոսքերով` Կիպրոսը պնդել է, որ թուրքական յուրաքանչյուր ինքնաթիռ գտնվի իր օպերացիոն վերահսկողության ներքո. «Նրանք փորձում են ստիպել թուրքական ինքնաթիռներին և ուղղաթիռներին վայրէջք կատարել (Կիպրոսի) հունական հատվածում: Մեզ համար դա անընդունելի է: Այդպես չի կարելի քաղաքականություն վարել»:
Երեքշաբթի Կիպրոսի նախագահ Նիկոս Անաստասիդիսը ընդունել է հրդեհների մարման մասին Թուրքիայի առաջարկը, սակայն այն պայմանով, որ թուրքական ինքնաթիռները պետք է ուղարկվեն ու համակարգվեն Կիպրոսի կառավարության կողմից:
Տարածաշրջանում անտառային հրդեհները մոլեգնել են կիրակի: Դրանք մարելու համար Կիպրոսին արդեն իսկ մոտ 20 ինքնաթիռ է ուղարկել 5 երկիր` Մեծ Բրիտանիա, Հունաստան, Իսրայել, Իտալիա, Ֆրանսիա:
