«ԱրմենՏելի» նորանշանակ գլխավոր տնօրեն Անդրեյ Պյատախինից «Առաջին լրատվական»-ը այսօր փորձեց ճշտել՝ իրականությանը համապատասխանո՞ւմ են արդյոք այն լուրերը, թե ընկերության նախկին տնօրեն Իգոր Կլիմկոյի գործունեության արդյունքում «ԱրմենՏելը» լուրջ ֆինանսական կորուստներ է ունեցել՝ 30 մլն դոլարի չափով, որից հետո ստիպված է եղել կրճատումներ կատարել: Շշուկներ կան նաև այն մասին, որ Կլիմկոն մեծ գումարներ է յուրացրել: «Ես տեղյակ չեմ դրանից: Վստահ եմ՝ խոսակցություններն այդ մասին չափազանցված են»,- պատասխանեց Պյատախինը:
Պատասխանելով «Առաջին լրատվական»-ի այն հարցին, թե արդյոք շահերի բախում չկա՞ ՊԵԿ նախագահ Գագիկ Խաչատրյանի եղբորը՝ Սամվել Խաչատրյանին, «ԱրմենՏելում» նշանակելով ավելի բարձր պաշտոնում, Պյատախինը նշեց, որ ինքը «պաշտոնական փաստաթղթերում Սամվելի և «Յուքոմի» միջև կապ» չի տեսել:
«Սամվելն աշխատում է «ԱրմենՏելում», չգիտեմ՝ 20, 15 տարի, նա միշտ աշխատել է ֆիքսված կապի ոլորտում, ղեկավարել է մարզերից մեկի կապի բաժինը: Այժմ նա տեղափոխվել է մի պաշտոնի, որտեղ պատասխանատու է լինելու ֆիքսված բոլոր այդ կապերի համար: Նա մի աստիճանով է միայն բարձրացվել, և այդ բարձրացումը տեղի է ունեցել ոչ թե այն պատճառով, որ նա ինչ-որ մեկի եղբայրն է, այլ որովհետև մարդը իսկապես փորձառու է»,- ասաց Պյատախինը:
Ucom-ի ցանցը անցնում է օդային տարածքով, ինչը որոշ առումով ապահով չէ, և երբեմն կարող են խափանումներ լինել՝ ի տարբերություն «ԱրմենՏելի» ստորգետնյա ենթակառուցվածքների՝ խողովակների ու դիտահորերի, որոնցով անցնում են ինտերնետի մալուխները: Մի քանի ամիս առաջ խոսակցություններ էին շրջանառվում այն մասին, որ Գագիկ Խաչատրյանը աչք է դրել «ԱրմենՏելի» ստորգետնյա ենթակառուցվածքների վրա:
Անդրեյ Պյատախինը այսօր հայտարարեց, որ նույնիսկ ցանկության դեպքում «ԱրմենՏելը» չի կարող իր ենթակառուցվածքները վաճառել կամ փոխանցել Ucom-ին, քանի որ դա թույլ չի տալիս հեռահաղորդակցության ոլորտը կարգավորող օրենսդրությունը: «Մենք մեր ենթակառուցվածքները ավելի քան 10 կապի օպերատորների արդեն իսկ տրամադրում ենք: Եվ ես պատրաստ եմ դրանք տրամադրել ցանկացած այլ օպերատորի, կարևոր չէ՝ Ucom-ը կլինի դա, թե ոչ, սակայն միայն վարձակալության հիմունքներով, միայն բաց, հրապարակային մրցույթով և բոլորի համար հավասարության ապահովման սկզբունքով»,- հայտարարեց «ԱրմենՏելի» նորանշանակ գլխավոր տնօրենը:
